అథర్వశిఖోపనిషత్

॥ అథర్వశిఖోపనిషత్ ॥
ఓఙ్కారార్థతయా భాతం తుర్యోఙ్కారాగ్రభాసురమ్ ।
తుర్యతుర్యన్త్రిపాద్రామం స్వమాత్రం కలయేఽన్వహమ్ ॥

ఓం భద్రం కర్ణేభిః శృణుయామ దేవాః । భద్రం పశ్యేమాక్షభిర్యజత్రాః ।
స్థిరైరఙ్గైస్తుష్టువాఃసస్తనూభిర్వ్యశేమ దేవహితం యదాయుః ।
స్వస్తి న ఇన్ద్రో వృద్ధశ్రవాః । స్వస్తి నః పూషా విశ్వవేదాః ।
స్వస్తి నస్తార్క్ష్యో అరిష్టనేమిః । స్వస్తి నో బృహస్పతిర్దధాతు ॥

ఓం   శాన్తిః   శాన్తిః   శాన్తిః ॥

ఓం అథ హైనం పైప్పలాదోఽఙ్గిరాః సనత్కుమారశ్చాథర్వణమువాచ భగవన్కిమాదౌ ప్రయుక్తం 

ధ్యానం ధ్యాయితవ్యం కిం తద్ధ్యానం కో వా ధ్యాతా కశ్చ ధ్యేయః ।
స ఏభ్యోథర్వా ప్రత్యువాచ ।
ఓమిత్యేతదక్షరమాదౌ ప్రయుక్తం ధ్యానం ధ్యాయితవ్యమిత్యేతదక్షరం 

పరం బ్రహ్మాస్య పాదాశ్చత్వారో వేదాశ్చతుష్పాదిదమక్షరం పరం బ్రహ్మ ।
పూర్వాస్య మాత్రా పృథివ్యకారః ఋగ్భిరృగ్వేదో బ్రహ్మా వసవో గాయత్రీ గార్హపత్యః ।
ద్వితీయాన్తరిక్షం స ఉకారః స యజుభిర్యజుర్వేదో విష్ణురుద్రాస్త్రిష్టుబ్దక్షిణాగ్నిః ।
తృతీయః ద్యౌః స మకారః స సామభిః సామవేదో రుద్రా ఆదిత్యా జగత్యాహవనీయః ।
యావసానేఽస్య చతుర్థ్యర్ధమాత్రా సా సోమలోక ఓఙ్కారః

 సాథర్వణమన్త్రైరథర్వవేదః సంవర్తకోఽగ్నిర్మరుతో విరాడేకర్షిర్భాస్వతీ స్మృతా ।
ప్రథమా రక్తపీతా మహద్బ్రహ్మ దైవత్యా ।
ద్వితీయా విద్యుమతీ కృష్ణా విష్ణుదైవత్యా ।
తృతీయా శుభాశుభా శుక్లా రుద్రదైవత్యా ।
యావాసానేఽస్య చతుర్థ్యర్ధమాత్రా సా విద్యుమతీ సర్వవర్ణా పురుషదైవత్యా ।
స ఏష హ్యోఙ్కారశ్చతురక్షరశ్చతుష్పాదశ్చతుఃశిరశ్చతుర్థమాత్రః స్థూలమేతద్హ్రస్వదీర్ఘప్లుత ఇతి ॥

ఓం ఓం ఓం ఇతి త్రిరుక్త్వా చతుర్థః శాన్త ఆత్మాప్లుతప్రణవప్రయోగేణ సమస్తమోమితి

 ప్రయుక్త ఆత్మజ్యోతిః సకృదావర్తతే సకృదుచ్చారితమాత్రః స ఏష ఊర్ధ్వమన్నమయతీత్యోఙ్కారః ।
ప్రాణాన్సర్వాన్ప్రలీయత ఇతి ప్రలయః ।
ప్రాణాన్సర్వాన్పరమాత్మని ప్రణానయతీత్యేతస్మాత్ప్రణవః ।
చతుర్థావస్థిత ఇతి సర్వదేవవేదయోనిః సర్వవాచ్యవస్తు ప్రణవాత్మకమ్ ॥ ౧॥

దేవాశ్చేతి సన్ధత్తాం సర్వేభ్యో దుఃఖభయేభ్యః సన్తారయతీతి తారణాత్తారః ।

 సర్వే దేవాః సంవిశన్తీతి విష్ణుః । సర్వాణి బృహయతీతి బ్రహ్మా ।

 సర్వేభ్యోఽన్తస్థానేభ్యో ధ్యేయేభ్యః ప్రదీపవత్ప్రకాశయతీతి ప్రకాశః ।

 ప్రకాశేభ్యః సదోమిత్యన్తః శరీరే విద్యుద్వద్ద్యోతయతి ముహుర్ముహురితి విద్యుద్వత్ప్రతీయాద్దిశం

 దిశం భిత్త్వా సర్వాంల్లోకాన్వ్యాప్నోతి వ్యాపయతీతి వ్యాపనాద్వ్యాపీ మహాదేవః ॥ ౨॥

పూర్వాస్య మాత్రా జాగర్తి జాగరితం ద్వితీయా స్వప్నం తృతీయా సుషుప్తిశ్చతుర్థీ 

తురీయం మాత్రా మాత్రాః ప్రతిమాత్రాగతాః

 సమ్యక్సమస్తానపి పాదాఞ్జయతీతి స్వయమ్ప్రకాశః స్వయం

 బ్రహ్మ భవతీత్యేష సిద్ధికర ఏతస్మాద్ధ్యానాదౌ ప్రయుజ్యతే ।

 సర్వ కరణోపసంహారత్వాద్ధార్యధారణాద్బ్రహ్మ తురీయమ్ ।

 సర్వకరణాని మనసి సమ్ప్రతిష్ఠాప్య ధ్యానం విష్ణుః ప్రాణం మనసి సహ కరణైః

 సమ్ప్రతిష్ఠాప్య ధ్యాతా రుద్రః ప్రాణం మనసి సహకరణైర్నాదాన్తే పరమాత్మని సమ్ప్రతిష్ఠాప్య ధ్యాయీతేశానం

 ప్రధ్యాయితవ్యం సర్వమిదం బ్రహ్మవిష్ణురుద్రేన్ద్రాస్తే సమ్ప్రసూయన్తే సర్వాణి చేన్ద్రియాణి

 సహ భూతైర్న కారణం కారణానాం ధ్యాతా కారణం తు ధ్యేయః

 సర్వైశ్వర్యసమ్పన్నః శమ్భురాకాశమధ్యే ధ్రువం స్తబ్ధ్వాధికం

 క్షణమేకం క్రతుశతస్యాపి చతుఃసప్తత్యా యత్ఫలం తదవాప్నోతి కృత్స్నమోఙ్కారగతిం చ

 సర్వధ్యానయోగజ్ఞానానాం యత్ఫలమోఙ్కారో వేద పర ఈశో వా శివ ఏకో ధ్యేయః శివఙ్కరః

 సర్వమన్యత్పరిత్యజ్య సమస్తాథర్వశిఖైతామధీత్య ద్విజో గర్భవాసాద్విముక్తో

 విముచ్యత ఏతామధీత్య ద్విజో గర్భవాసాద్విముక్తో విముచ్యత ఇత్యోఃసత్యమిత్యుపనిషత్ ॥ ౩॥

ఓం భద్రం కర్ణేభిరితి శాన్తిః ॥
॥ ఇతి అథర్వవేదీయ అథర్వశిఖోపనిషత్సమాప్తా ॥

నవగ్రహ ధ్యాన మన్త్రాః

 ॥ నవగ్రహ ధ్యాన మన్త్రాః సాధుసఙ్కులి తన్త్రాన్తర్గతమ్ ॥

గ్రహపురశ్చరణ ప్రయోగః

ఓం రక్తపద్మాసనం దేవం చతుర్బాహుసమన్వితమ్ ।
క్షత్రియం రక్తవర్ణఞ్చ గోత్రం కాశ్యపసమ్భవమ్ ॥

సప్తాశ్వరథమారూఢం ప్రచణ్డం సర్వసిద్ధిదమ్ ।
ద్విభుజం రక్తపద్మైశ్చ సంయుక్తం పరమాద్భుతమ్ ॥

కలిఙ్గదేశజం దేవం మౌలిమాణిక్యభూషణమ్ ।
త్రినేత్రం తేజసా పూర్ణముదయాచలసంస్థితమ్ ॥

ద్వాదశాఙ్గుల-విస్తీర్ణం ప్రవరం ఘృతకౌశికమ్ ।
శివాధిదైవం పుర్వాస్యం బ్రహ్మప్రత్యధిదైవతమ్ ॥

క్లీం ఐం శ్రీం హ్రీం సూర్యాయ నమః ।

ఓం శుక్లం శుక్లామ్బరధరం శ్వేతాబ్జస్థం చతుర్భుజమ్ ।
హారకేయూరనూపురైర్మణ్డితం తమసాపహమ్ ॥

సుఖదృశ్యం సుధాయుక్త-మాత్రేయం వైశ్యజాతిజమ్ ।
కలఙ్కాఙ్కితసర్వాఙ్గం కేశపాశాతిసున్దరమ్ ॥

ముకుటేర్మణిమాణిక్యైః శోభనీయం తు లోచనమ్ ।
యోషిత్ప్రియం మహానన్దం యమునాజలసమ్భవమ్ ॥

ఉమాధిదైవతం దేవమాపప్రత్యధిదైవతమ్ ॥

హ్రీం హ్రీం హుం సోమాయ స్వాహా ।

ఓం మేశాధిరూఢం ద్విభుజం శక్తిచాపధరం ముదా ।
రక్తవర్ణం మహాతేజం తేజస్వీనాం సమాకులమ్ ॥

రక్తవస్త్రపరిధానమ్ నానాలఙ్కారసంయుతమ్ ।
రక్తాఙ్గం ధరణీపుత్రం రక్తమాల్యానులేపనమ్ ॥

హస్తే వారాహదశనం పృష్ఠే తూణసమన్వితమ్ ।
కటాక్షాద్ భీతిజనకం మహామోహప్రదం మహత్ ॥

మహాచాపధరం దేవం మహోగ్రముగ్రవిగ్రహమ్ ।
స్కన్దాదిదైవం సూర్యాస్యం క్షితిప్రత్యధిదైవతమ్ ॥

హ్రీం ఓం ఐం కుజాయ స్వాహా ।

ఓం సుతప్తస్వర్ణాభతనుం రోమరాజివిరాజితమ్ ।
ద్విభుజం స్వర్ణదణ్డేవ శరచ్చన్ద్రనిభాననమ్ ॥

చరణే రత్నమఞ్జీరం కుమారం శుభలక్షణమ్ ।
స్వర్ణయజ్ఞోపవీతఞ్చ పీతవస్త్రయుగావృతమ్ ॥

అత్రిగోత్రసముత్పన్నం వైశ్యజాతిం మహాబలమ్ ।
మాగధం మహిమాపూర్ణం ద్వినేత్రం ద్విభుజం శుభమ్ ॥

నారాయణాధిదైవఞ్చ విష్ణుప్రత్యధిదైవతమ్ ।
చిన్తయేత్ సోమతనయం సర్వాభిష్టఫలప్రదం ॥

ఓం క్లీం ఓం బుధాయ స్వాహా ।

ఓం కనకరుచిరగౌరం చారుమూర్తిం ప్రసన్నం
ద్విభుజమపి సరజౌ సన్దధానం సురేజ్యం ।
వసనయుగదధానం పీతవస్త్రం సుభద్రం
సురవరనరపుజ్యమఙ్గిరోగోత్రయుక్తమ్ ॥

ద్విజవరకులజాతం సిన్ధుదేశప్రసిద్ధం
త్రిజగతి గణశ్రేష్ఠశ్చాధిదైవం తదీయమ్ ।
సకలగిరినిహన్తా ఇన్ద్రః ప్రత్యాధిదైవం 
గ్రహగణగురునాథం తం భజేఽభీష్టసిద్ధౌ ॥

రం యం హ్రీం ఐం గురవే నమః ।

ఓం శుక్లామ్బరం శుక్లరుచిం సుదీప్తం
తుషారకున్దేన్దుద్యుతిం చతుర్భుజమ్ ।
ఇన్ద్రాధిదైవం శచీప్రత్యాధిదైవం
వేదార్థవిజ్ఞం చ కవిం కవీనామ్ ॥

భృగుగోత్రయుక్తం ద్విజజాతిమాత్రం
దితీన్ద్రపూజ్యం ఖలు శుద్ధిశాన్తం ।
సర్వార్థసిద్ధిప్రదమేవ కావ్యం
భజేఽప్యహం భోజకతోద్భవం భృగుమ్ ॥

హుం హుం శ్రీం శ్రీం నం రం శుక్రాయ స్వాహా ।

ఓం సౌరిం గృధ్రగతాతికృష్ణవపుషం కాలాగ్నివత్ సఙ్కులం
సంయుక్తం భుజపల్లవైరుపలసత్స్తమ్భైశ్చతుర్భిః సమైః ।
భీమం చోగ్రమహాబలాతివపుషం బాధాగణైః సంయుతం
గోత్రం కాశ్యపజం సురాష్ట్రవిభవం కాలాగ్నిదైవం శనిమ్ ॥

వస్త్రైః కృష్ణమయైర్యుతం తనువరం తం సూర్యసూనుం భజే ॥

హ్రీం క్లీమ్ శనైశ్చరాయ నమః ।

ఓం మహిషస్థం కృష్ణం వదనమయవిభుం కర్ణనాసాక్షిమాత్రమ్
కారాలాస్యం భీమం గదవిభవయుతం శ్యామవర్ణం మహోగ్రం ।
పైఠీనం గోత్రయుక్తం రవిశశీదమనం చాధిదైవం యమోఽపి
సర్పప్రత్యధిదైవతం మలయగీర్భావం తం తమసం నమామి ॥

వం ఐం వం వం క్లీం వం తమసే స్వాహా ।

ఓం మహోగ్రం ధూమాభం కరచరణయుతం ఛిన్నశీర్షం సుదీప్తమ్
హస్తే వాణం కృపాణం త్రిశిఖశశిధృతం వేదహస్తం ప్రసన్నం ।
బ్రహ్మా తస్యాధిదైవం సకలగదయుతం సర్పప్రత్యధిదైవం ధ్యాయేత్
కేతుం విశాలం సకలసురనరే శాన్తిదం పుష్టిదఞ్చ ॥

శ్రీం శ్రీం ఆం వం రం లం కేతవే స్వాహా ।