నారాయణస్తోత్రం

త్రిభువనభవనాభిరామకోశం సకలకళంకహరం పరం ప్రకాశమ్ |

అశరణశరణం శరణ్యమీశం హరిమజమచ్యుతమీశ్వరం ప్రపద్యే || ౧ ||
కువలయదలనీలసంనికాశం శరదమలామ్బరకోటరోపమానమ్ |
భ్రమరతిమిరకజ్జలాఞ్జనాభం సరసిజచక్రగదాధరం ప్రపద్యే || ౨ ||
విమలమలికలాపకోమలాఙ్గం సితజలపఙ్కజకుడ్మలాభశఙ్ఖమ్
శ్రుతిరణితవిరఞ్చిచఞ్చరీకం స్వహృదయపద్మదలాశ్రయం ప్రపద్యే || ౩ ||
సితనఖగణతారకావికీర్ణం స్మితధవలాననపీవరేన్దుబిమ్బమ్
హృదయమణిమరీచిజాలగఙ్గం హరిశరదమ్బరమాతతం ప్రపద్యే || ౪ ||
అవిరలకృతసృష్టిసర్వలీనం సతతమజాతమవర్థనం విశాలమ్
గుణశతజరఠాభిజాతదేహం తరుదలశాయిన మర్భకం ప్రపద్యే || ౫ ||
నవవికసితపద్మరేణుగౌరం స్ఫుటకమలావపుషా విభూషితాఙ్గమ్
దినశమసమయారుణాఙ్గరాగం కనకనిభామ్బరసున్దరం ప్రపద్యే || ౬ ||
దితిసుతనలినీతుషారపాతం సురనలినీసతతోదితార్కబిమ్బమ్
కమలజనలినీజలావపూరం హృది నలినీనిలయం విభుం ప్రపద్యే || ౭ ||
త్రిభువననలినీసితారవిన్దం తిమిరసమానవిమోహదీపమగ్ర్యమ్
స్ఫుటతరమజడం చిదాత్మతత్త్వం జగదఖిలార్తిహరం హరిం ప్రపద్యే || ౮ ||

బాలముకుందాష్టకం

కరారవిందేన పదారవిందం ముఖారవిందే వినివేశయంతమ్ |

వటస్య పత్రస్య పుటే శయానం బాలం ముకుందం మనసా స్మరామి || ౧ ||
సంహృత్య లోకాన్వటపత్రమధ్యే శయానమాద్యంతవిహీనరూపమ్ |
సర్వేశ్వరం సర్వహితావతారం బాలం ముకుందం మనసా స్మరామి || ౨ ||
ఇందీవరశ్యామలకోమలాంగం ఇంద్రాదిదేవార్చితపాదపద్మమ్ |
సంతానకల్పద్రుమమాశ్రితానాం బాలం ముకుందం మనసా స్మరామి || ౩ ||
లంబాలకం లంబితహారయష్టిం శృంగారలీలాంకితదంతపంక్తిమ్ |
బింబాధరం చారువిశాలనేత్రం బాలం ముకుందం మనసా స్మరామి || ౪ ||
శిక్యే నిధాయాద్యపయోదధీని బహిర్గతాయాం వ్రజనాయికాయామ్ |
భుక్త్వా యథేష్టం కపటేన సుప్తం బాలం ముకుందం మనసా స్మరామి || ౫ ||
కలిందజాంతస్థితకాలియస్య ఫణాగ్రరంగేనటనప్రియంతమ్ |
తత్పుచ్ఛహస్తం శరదిందువక్త్రం బాలం ముకుందం మనసా స్మరామి || ౬ ||
ఉలూఖలే బద్ధముదారశౌర్యం ఉత్తుంగయుగ్మార్జున భంగలీలమ్ |
ఉత్ఫుల్లపద్మాయత చారునేత్రం బాలం ముకుందం మనసా స్మరామి || ౭ ||
ఆలోక్య మాతుర్ముఖమాదరేణ స్తన్యం పిబంతం సరసీరుహాక్షమ్ |
సచ్చిన్మయం దేవమనంతరూపం బాలం ముకుందం మనసా స్మరామి || ౮ ||

మధురాష్టకం

అధరం మధురం వదనం మధురం నయనం మధురం హసితం మధురమ్ |

హృదయం మధురం గమనం మధురం మధురాధిపతేరఖిలం మధురమ్ || ౧ ||
వచనం మధురం చరితం మధురం వసనం మధురం వలితం మధురమ్ |
చలితం మధురం భ్రమితం మధురం మధురాధిపతేరఖిలం మధురమ్ || ౨ ||
వేణుర్మధురో రేణుర్మధురః పాణిర్మధురః పాదౌ మధురౌ |
నృత్యం మధురం సఖ్యం మధురం మధురాధిపతేరఖిలం మధురమ్ || ౩ ||
గీతం మధురం పీతం మధురం భుక్తం మధురం సుప్తం మధురమ్ |
రూపం మధురం తిలకం మధురం మధురాధిపతేరఖిలం మధురమ్ || ౪ ||
కరణం మధురం తరణం మధురం హరణం మధురం స్మరణం మధురమ్ |
వమితం మధురం శమితం మధురం మధురాధిపతేరఖిలం మధురమ్ || ౫ ||
గుంజా మధురా మాలా మధురా యమునా మధురా వీచీ మధురా |
సలిలం మధురం కమలం మధురం మధురాధిపతేరఖిలం మధురమ్ || ౬ ||
గోపీ మధురా లీలా మధురా యుక్తం మధురం ముక్తం మధురమ్ |
దృష్టం మధురం శిష్టం మధురం మధురాధిపతేరఖిలం మధురమ్ || ౭ ||
గోపా మధురా గావో మధురా యష్టిర్మధురా సృష్టిర్మధురా |
దలితం మధురం ఫలితం మధురం మధురాధిపతేరఖిలం మధురమ్ || ౮ ||

విష్ణుః అష్టావింశతినామ స్తోత్రం

అర్జున ఉవాచ-

కిం ను నామ సహస్రాణి జపతే చ పునః పునః |
యాని నామాని దివ్యాని తాని చాచక్ష్వ కేశవ || ౧ ||
శ్రీ భగవానువాచ-
మత్స్యం కూర్మం వరాహం చ వామనం చ జనార్దనమ్ |
గోవిందం పుండరీకాక్షం మాధవం మధుసూదనమ్ || ౨ ||
పద్మనాభం సహస్రాక్షం వనమాలిం హలాయుధమ్ |
గోవర్ధనం హృషీకేశం వైకుంఠం పురుషోత్తమమ్ || ౩ ||
విశ్వరూపం వాసుదేవం రామం నారాయణం హరిమ్ |
దామోదరం శ్రీధరం చ వేదాంగం గరుడధ్వజమ్ || ౪ ||
అనంతం కృష్ణగోపాలం జపతో నాస్తి పాతకమ్ |
గవాం కోటిప్రదానస్య అశ్వమేధశతస్య చ || ౫ ||
కన్యాదానసహస్రాణాం ఫలం ప్రాప్నోతి మానవః |
అమాయాం వా పౌర్ణమాస్యామేకాదశ్యాం తథైవ చ || ౬ ||
సంధ్యాకాలే స్మరేన్నిత్యం ప్రాతఃకాలే తథైవ చ |
మధ్యాహ్నే చ జపన్నిత్యం సర్వపాపైః ప్రముచ్యతే || ౭ ||

విష్ణుః షోడశనామస్తోత్రం

ఔషధే చింతయేద్విష్ణుం భోజనే చ జనార్దనమ్ |

శయనే పద్మనాభం చ వివాహే చ ప్రజాపతిమ్ || ౧ ||
యుద్ధే చక్రధరం దేవం ప్రవాసే చ త్రివిక్రమమ్ |
నారాయణం తనుత్యాగే శ్రీధరం ప్రియసంగమే || ౨ ||
దుఃస్వప్నే స్మర గోవిందం సంకటే మధుసూదనమ్ |
కాననే నారసింహం చ పావకే జలశాయినమ్ || ౩ ||
జలమధ్యే వరాహం చ పర్వతే రఘునందనమ్ |
గమనే వామనం చైవ సర్వకార్యేషు మాధవమ్ || ౪ ||
షోడశైతాని నామాని ప్రాతరూత్థాయ యః పఠేత్ |
సర్వపాపవినిర్ముక్తో విష్ణులోకే మహీయతే || ౫ ||

శ్రీమన్నారాయణాష్టాక్షరీ స్తుతి

ఓం ఓం నమః ప్రణవార్థార్థ స్థూలసూక్ష్మ క్షరాక్షర

 వ్యక్తావ్యక్త కళాతీత ఓంకారాయ నమో నమః || ౧ ||
న నమో దేవాదిదేవాయ దేహసంచారహేతవే
 దైత్యసంఘవినాశాయ నకారాయ నమో నమః || ౨ ||
మో మోహనం విశ్వరూపం చ శిష్టాచారసుపోషితమ్
 మోహవిధ్వంసకం వందే మోకారాయ నమో నమః || ౩ ||
నా నారాయణాయ నవ్యాయ నరసింహాయ నామినే
 నాదాయ నాదినే తుభ్యం నాకారాయ నమో నమః || ౪ ||
రా రామచంద్రం రఘుపతిం పిత్రాజ్ఞాపరిపాలకమ్
 కౌసల్యాతనయం వందే రాకారాయ నమో నమః || ౫ ||
య యజ్ఞాయ యజ్ఞగమ్యాయ యజ్ఞరక్షాకరాయ చ
 యజ్ఞాంగరూపిణే తుభ్యం యకారాయ నమో నమః || ౬ ||
ణా ణాకారం లోకవిఖ్యాతం నానాజన్మఫలప్రదమ్
 నానాభీష్టప్రదం వందే ణాకారాయ నమో నమః || ౭ ||
య యజ్ఞకర్త్రే యజ్ఞభర్త్రే యజ్ఞరూపాయ తే నమః
 సుజ్ఞానగోచరాయాzస్తు యకారాయ నమో నమః || ౮ ||

శ్రీనివాసగద్య

Srinivasa gadyam in telugu - శ్రీనివాసగద్యం

శ్రీమదఖిలమహీమండలమండనధరణీధర మండలాఖండలస్య, నిఖిలసురాసురవందిత వరాహక్షేత్ర విభూషణస్య, శేషాచల గరుడాచల సింహాచల వృషభాచల నారాయణాచలాంజనాచలాది శిఖరిమాలాకులస్య, నాథముఖ బోధనిధివీథిగుణసాభరణ సత్త్వనిధి తత్త్వనిధి భక్తిగుణపూర్ణ శ్రీశైలపూర్ణ గుణవశంవద పరమపురుషకృపాపూర విభ్రమదతుంగశృంగ గలద్గగనగంగాసమాలింగితస్య, సీమాతిగ గుణ రామానుజముని నామాంకిత బహు భూమాశ్రయ సురధామాలయ వనరామాయత వనసీమాపరివృత విశంకటతట నిరంతర విజృంభిత భక్తిరస నిర్ఘరానంతార్యాహార్య ప్రస్రవణధారాపూర విభ్రమద సలిలభరభరిత మహాతటాక మండితస్య, కలికర్దమ మలమర్దన కలితోద్యమ విలసద్యమ నియమాదిమ మునిగణనిషేవ్యమాణ ప్రత్యక్షీభవన్నిజసలిల సమజ్జన నమజ్జన నిఖిలపాపనాశనా పాపనాశన తీర్థాధ్యాసితస్య, మురారిసేవక జరాదిపీడిత నిరార్తిజీవన నిరాశ భూసుర వరాతిసుందర సురాంగనారతి కరాంగసౌష్ఠవ కుమారతాకృతి కుమారతారక సమాపనోదయ దనూనపాతక మహాపదామయ విహాపనోదిత సకలభువన విదిత కుమారధారాభిధాన తీర్థాధిష్ఠితస్య, ధరణితల గతసకల హతకలిల శుభసలిల గతబహుళ వివిధమల హతిచతుర రుచిరతర విలోకనమాత్ర విదళిత వివిధ మహాపాతక స్వామిపుష్కరిణీ సమేతస్య, బహుసంకట నరకావట పతదుత్కట కలికంకట కలుషోద్భట జనపాతక వినిపాతక రుచినాటక కరహాటక కలశాహృత కమలారత శుభమంజన జలసజ్జన భరభరిత నిజదురిత హతినిరత జనసతత నిరస్తనిరర్గళ పేపీయమాన సలిల సంభృత విశంకట కటాహతీర్థ విభూషితస్య, ఏవమాదిమ భూరిమంజిమ సర్వపాతక గర్వహాపక సిన్ధుడంబర హారిశంబర వివిధవిపుల పుణ్యతీర్థనివహ నివాసస్య, శ్రీమతో వేంకటాచలస్య శిఖరశేఖరమహాకల్పశాఖీ, ఖర్వీభవదతి గర్వీకృత గురుమేర్వీశగిరి ముఖోర్వీధర కులదర్వీకర దయితోర్వీధర శిఖరోర్వీ సతత సదూర్వీకృతి చరణఘన గర్వచర్వణనిపుణ తనుకిరణమసృణిత గిరిశిఖర శేఖరతరునికర తిమిరః, వాణీపతిశర్వాణీ దయితేన్ద్రాణిశ్వర ముఖ నాణీయోరసవేణీ నిభశుభవాణీ నుతమహిమాణీ య స్తన కోణీ భవదఖిల భువనభవనోదరః, వైమానికగురు భూమాధిక గుణ రామానుజ కృతధామాకర కరధామారి దరలలామాచ్ఛకనక దామాయిత నిజరామాలయ నవకిసలయమయ తోరణమాలాయిత వనమాలాధరః, కాలాంబుద మాలానిభ నీలాలక జాలావృత బాలాబ్జ సలీలామల ఫాలాంకసమూలామృత ధారాద్వయావధీరణ ధీరలలితతర విశదతర ఘన ఘనసార మయోర్ధ్వపుండ్ర రేఖాద్వయరుచిరః, సువికస్వర దళభాస్వర కమలోదర గతమేదుర నవకేసర తతిభాసుర పరిపింజర కనకాంబర కలితాదర లలితోదర తదాలంబ జంభరిపు మణిస్తంభ గమ్భీరిమదంభస్తంభ సముజ్జృంభమాణ పీవరోరుయుగళ తదాలంబ పృథుల కదలీ ముకుల మదహరణజంఘాల జంఘాయుగళః, నవ్యదల భవ్యమల పీతమల శోణిమలసన్మృదుల సత్కిసలయాశ్రుజలకారి బల శోణతల పదకమల నిజాశ్రయ బలబందీకృత శరదిందుమండలీ విభ్రమదాదభ్ర శుభ్ర పునర్భవాధిష్ఠితాంగుళీగాఢ నిపీడిత పద్మావనః, జానుతలావధి లమ్బ విడంబిత వారణ శుండాదండ విజృంభిత నీలమణిమయ కల్పకశాఖా విభ్రమదాయి మృణాళలతాయిత సముజ్జ్వలతర కనకవలయ వేల్లితైకతర బాహుదండయుగళః, యుగపదుదిత కోటి ఖరకర హిమకర మండల జాజ్వల్యమాన సుదర్శన పాంచజన్య సముత్తుంగిత శృంగాపర బాహుయుగళః, అభినవశాణ సముత్తేజిత మహామహా నీలఖండ మదఖండన నిపుణ నవీన పరితప్త కార్తస్వర కవచిత మహనీయ పృథుల సాలగ్రామ పరంపరా గుంభిత నాభిమండల పర్యంత లంబమాన ప్రాలంబదీప్తి సమాలంబిత విశాల వక్షఃస్థలః, గంగాఝర తుంగాకృతి భంగావళి భంగావహ సౌధావళి బాధావహ ధారానిభ హారావళి దూరాహత గేహాంతర మోహావహ మహిమ మసృణిత మహాతిమిరః, పింగాకృతి భృంగార నిభాంగార దళాంగామల నిష్కాసిత దుష్కార్యఘ నిష్కావళి దీపప్రభ నీపచ్ఛవి తాపప్రద కనకమాలికా పిశంగిత సర్వాంగః, నవదళిత దళవలిత మృదులలిత కమలతతి మదవిహతి చతురతర పృథులతర సరసతర కనకసరమయ రుచిరకంఠికా కమనీయకంఠః, వాతాశనాధిపతి శయన కమన పరిచరణ రతిసమేతాఖిల ఫణధరతతి మతికరవర కనకమయ నాగాభరణ పరివీతాఖిలాంగా వగమిత శయన భూతాహిరాజ జాతాతిశయః, రవికోటీ పరిపాటీ ధరకోటీ రవరాటీ కితవీటీ రసధాటీ ధరమణిగణకిరణ విసరణ సతతవిధుత తిమిరమోహ గార్భగేహః, అపరిమిత వివిధభువన భరితాఖండ బ్రహ్మాండమండల పిచండిలః, ఆర్యధుర్యానంతార్య పవిత్ర ఖనిత్రపాత పాత్రీకృత నిజచుబుక గతవ్రణకిణ విభూషణ వహనసూచిత శ్రితజన వత్సలతాతిశయః, మడ్డుడిండిమ ఢమరు జర్ఘర కాహళీ పటహావళీ మృదుమద్దలాది మృదంగ దుందుభి ఢక్కికాముఖ హృద్య వాద్యక మధురమంగళ నాదమేదుర నాటారభి భూపాళ బిలహరి మాయామాళవ గౌళ అసావేరీ సావేరీ శుద్ధసావేరీ దేవగాంధారీ ధన్యాసీ బేగడ హిందుస్తానీ కాపీ తోడి నాటకురుంజీ శ్రీరాగ సహన అఠాణ సారంగీ దర్బారు పంతువరాళీ వరాళీ కళ్యాణీ భూరికళ్యాణీ యమునాకళ్యాణీ హుశేనీ జంఝోఠీ కౌమారీ కన్నడ ఖరహరప్రియా కలహంస నాదనామక్రియా ముఖారీ తోడీ పున్నాగవరాళీ కాంభోజీ భైరవీ యదుకులకాంభోజీ ఆనందభైరవీ శంకరాభరణ మోహన రేగుప్తీ సౌరాష్ట్రీ నీలాంబరీ గుణక్రియా మేఘగర్జనీ హంసధ్వని శోకవరాళీ మధ్యమావతీ జేంజురుటీ సురటీ ద్విజావంతీ మలయాంబరీ కాపీపరశు ధనాసిరీ దేశికతోడీ ఆహిరీ వసంతగౌళీ సంతు కేదారగౌళ కనకాంగీ రత్నాంగీ గానమూర్తీ వనస్పతీ వాచస్పతీ దానవతీ మానరూపీ సేనాపతీ హనుమత్తోడీ ధేనుకా నాటకప్రియా కోకిలప్రియా రూపవతీ గాయకప్రియా వకుళాభరణ చక్రవాక సూర్యకాంత హాటకాంబరీ ఝంకారధ్వనీ నటభైరవీ కీరవాణీ హరికాంభోదీ ధీరశంకరాభరణ నాగానందినీ యాగప్రియాది  విసృమర సరస గానరుచిర సంతత సంతన్యమాన నిత్యోత్సవ పక్షోత్సవ మాసోత్సవ సంవత్సరోత్సవాది వివిధోత్సవ కృతానందః శ్రీమదానందనిలయ విమానవాసః, సతత పద్మాలయా పదపద్మరేణు సంచితవక్షస్తల పటవాసః, శ్రీశ్రీనివాసః సుప్రసన్నో విజయతాం. శ్రీఅలర్మేల్మంగా నాయికాసమేతః శ్రీశ్రీనివాస స్వామీ సుప్రీతః సుప్రసన్నో వరదో భూత్వా, పవన పాటలీ పాలాశ బిల్వ పున్నాగ చూత కదళీ చందన చంపక మంజుళ మందార హింజులాది తిలక మాతులుంగ నారికేళ క్రౌంచాశోక మాధూకామలక హిందుక నాగకేతక పూర్ణకుంద పూర్ణగంధ రస కంద వన వంజుళ ఖర్జూర సాల కోవిదార హింతాల పనస వికట వైకసవరుణ తరుఘమరణ విచుళంకాశ్వత్థ యక్ష వసుధ వర్మాధ మన్త్రిణీ తిన్త్రిణీ బోధ న్యగ్రోధ ఘటవటల జంబూమతల్లీ వీరతచుల్లీ వసతి వాసతీ జీవనీ పోషణీ ప్రముఖ నిఖిల సందోహ తమాల మాలా మహిత విరాజమాన చషక మయూర హంస భారద్వాజ కోకిల చక్రవాక కపోత గరుడ నారాయణ నానావిధ పక్షిజాతి సమూహ బ్రహ్మ క్షత్రియ వైశ్య శూద్ర నానాజాత్యుద్భవ దేవతా నిర్మాణ మాణిక్య వజ్ర వైఢూర్య గోమేధిక పుష్యరాగ పద్మరాగేంద్ర నీల ప్రవాళమౌక్తిక స్ఫటిక హేమ రత్నఖచిత ధగద్ధగాయమాన రథ గజ తురగ పదాతి సేనా సమూహ భేరీ మద్దళ మురవక ఝల్లరీ శంఖ కాహళ నృత్యగీత తాళవాద్య కుంభవాద్య పంచముఖవాద్య అహమీమార్గన్నటీవాద్య కిటికుంతలవాద్య సురటీచౌండోవాద్య తిమిలకవితాళవాద్య తక్కరాగ్రవాద్య ఘంటాతాడన బ్రహ్మతాళ సమతాళ కొట్టరీతాళ ఢక్కరీతాళ ఎక్కాళ ధారావాద్య పటహకాంస్యవాద్య భరతనాట్యాలంకార కిన్నెర కింపురుష రుద్రవీణా ముఖవీణా వాయువీణా తుంబురువీణా గాంధర్వవీణా నారదవీణా స్వరమండల రావణహస్తవీణాస్తక్రియాలంక్రియాలంకృతానేకవిధవాద్య వాపీకూపతటాకాది గంగాయమునా రేవావరుణా
శోణనదీశోభనదీ సువర్ణముఖీ వేగవతీ వేత్రవతీ క్షీరనదీ బాహునదీ గరుడనదీ కావేరీ తామ్రపర్ణీ ప్రముఖాః
మహాపుణ్యనద్యః సజలతీర్థైః సహోభయకూలంగత సదాప్రవాహ ఋగ్యజుస్సామాథర్వణ వేదశాస్త్రేతిహాస పురాణ సకలవిద్యాఘోష భానుకోటిప్రకాశ చంద్రకోటి సమాన నిత్యకళ్యాణ పరంపరోత్తరోత్తరాభివృద్ధిర్భూయాదితి భవంతో మహాంతోzనుగృహ్ణంతు, బ్రహ్మణ్యో రాజా ధార్మికోzస్తు, దేశోయం నిరుపద్రవోzస్తు, సర్వే సాధుజనాస్సుఖినో విలసంతు, సమస్తసన్మంగళాని సంతు, ఉత్తరోత్తరాభివృద్ధిరస్తు, సకలకళ్యాణ సమృద్ధిరస్తు. హరిః ఓం.

గురుస్తోత్రం

అఖండమండలాకారం వ్యాప్తం యేన చరాచరమ్ |

తత్పదం దర్శితం యేన తస్మై శ్రీగురవే నమః || ౧ ||
అజ్ఞానతిమిరాంధస్య జ్ఞానాంజనశలాకయా |
చక్షురున్మీలితం యేన తస్మై శ్రీగురవే నమః || ౨ ||
గురుర్బ్రహ్మా గురుర్విష్ణుః గురుర్దేవో మహేశ్వరః |
గురురేవ పరం బ్రహ్మ తస్మై శ్రీగురవే నమః || ౩ ||
స్థావరం జంగమం వ్యాప్తం యత్కించిత్సచరాచరమ్ |
తత్పదం దర్శితం యేన తస్మై శ్రీగురవే నమః || ౪ ||
చిన్మయం వ్యాపి యత్సర్వం త్రైలోక్యం సచరాచరమ్ |
తత్పదం దర్శితం యేన తస్మై శ్రీగురవే నమః || ౫ ||
సర్వశ్రుతిశిరోరత్నవిరాజితపదాంబుజః |
వేదాంతాంబుజసూర్యో యస్తస్మై శ్రీగురవే నమః || ౬ ||
చైతన్యః శాశ్వతః శాంతో వ్యోమాతీతో నిరంజనః |
బిందునాదకలాతీతస్తస్మై శ్రీగురవే నమః || ౭ ||
జ్ఞానశక్తిసమారూఢః తత్త్వమాలావిభూషితః |
భుక్తిముక్తిప్రదాతా చ తస్మై శ్రీగురవే నమః || ౮ ||
అనేకజన్మసంప్రాప్తకర్మబంధవిదాహినే |
ఆత్మజ్ఞానప్రదానేన తస్మై శ్రీగురవే నమః || ౯ ||
శోషణం భవసింధోశ్చ జ్ఞాపనం సారసంపదః |
గురోః పాదోదకం సమ్యక్ తస్మై శ్రీగురవే నమః || ౧౦ ||
న గురోరధికం తత్త్వం న గురోరధికం తపః |
తత్త్వజ్ఞానాత్ పరం నాస్తి తస్మై శ్రీగురవే నమః || ౧౧ ||
మన్నాథః శ్రీజగన్నాథః మద్గురుః శ్రీజగద్గురుః |
మదాత్మా సర్వభూతాత్మా తస్మై శ్రీగురవే నమః || ౧౨ ||
గురురాదిరనాదిశ్చ గురుః పరమదైవతమ్ |
గురోః పరతరం నాస్తి తస్మై శ్రీగురవే నమః || ౧౩ ||
బ్రహ్మానందం పరమసుఖదం కేవలం జ్ఞానమూర్తిం
ద్వంద్వాతీతం గగనసదృశం తత్త్వమస్యాదిలక్ష్యమ్ |
ఏకం నిత్యం విమలమచలం సర్వధీసాక్షిభూతం
భావాతీతం త్రిగుణరహితం సద్గురుం తం నమామి || ౧౪ ||
త్వమేవ మాతా చ పితా త్వమేవ
త్వమేవ బంధుశ్చ సఖా త్వమేవ |
త్వమేవ విద్యా ద్రవిణం త్వమేవ
త్వమేవ సర్వం మమ దేవదేవ || ౧౪ ||

నారాయణి స్తుతి

సర్వస్య బుద్ధిరూపేణ జనస్య హృది సంస్థితే |

స్వర్గాపవర్గదే దేవి నారాయణి నమోzస్తు తే || ౧ ||
కలాకాష్ఠాదిరూపేణ పరిణామప్రదాయిని |
విశ్వస్యోపరతౌ శక్తే నారాయణి నమోzస్తు తే || ౨ ||
సర్వమంగళమాంగళ్యే శివే సర్వార్థసాధికే |
శరణ్యే త్ర్యంబకే గౌరి నారాయణి నమోzస్తు తే || ౩ ||
సృష్టిస్థితివినాశానాం శక్తిభూతే సనాతని |
గుణాశ్రయే గుణమయే నారాయణి నమోzస్తు తే || ౪ ||
శరణాగతదీనార్తపరిత్రాణపరాయణే |
సర్వస్యార్తిహరే దేవి నారాయణి నమోzస్తు తే || ౫ ||
హంసయుక్తవిమానస్థే బ్రహ్మాణీరూపధారిణి |
కౌశాంభఃక్షరికే దేవి నారాయణి నమోzస్తు తే || ౬ ||
త్రిశూలచంద్రాహిధరే మహావృషభవాహిని |
మాహేశ్వరీస్వరూపేణ నారాయణి నమోzస్తుతే || ౭ ||
మయూరకుక్కుటవృతే మహాశక్తిధరేzనఘే |
కౌమారీరూపసంస్థానే నారాయణి నమోzస్తు తే || ౮ ||
శంఖచక్రగదాశార్ఙ్గగృహీతపరమాయుధే |
ప్రసీద వైష్ణవీరూపే నారాయణి నమోzస్తు తే || ౯ ||
గృహీతోగ్రమహాచక్రే దంష్ట్రోద్ధృతవసుంధరే |
వరాహరూపిణి శివే నారాయణి నమోzస్తు తే || ౧౦ ||
నృసింహరూపేణోగ్రేణ హంతుం దైత్యాన్ కృతోద్యమే |
త్రైలోక్యత్రాణసహితే నారాయణి నమోzస్తు తే || ౧౧ ||
కిరీటిని మహావజ్రే సహస్రనయనోజ్జ్వలే |
వృత్రప్రాణహరే చైంద్రి నారాయణి నమోzస్తు తే || ౧౨ ||
శివదూతీస్వరూపేణ హతదైత్యమహాబలే |
ఘోరరూపే మహారావే నారాయణి నమోzస్తు తే || ౧౩ ||
దంష్ట్రాకరాలవదనే శిరోమాలావిభూషణే |
చాముండే ముండమథనే నారాయణి నమోzస్తు తే || ౧౪ ||
లక్ష్మి లజ్జే మహావిద్యే శ్రద్ధే పుష్టి స్వధే ధ్రువే |
మహారాత్రి మహామాయే నారాయణి నమోzస్తు తే || ౧౫ ||
మేధే సరస్వతి వరే భూతి బాభ్రవి తామసి |
నియతే త్వం ప్రసీదేశే నారాయణి నమోzస్తుతే || ౧౬ ||
ఇతి శ్రీ దుర్గామాహాత్మ్యే నారాయణి స్తుతి |

శివలింగ దర్శనాంతర్గత నందీశ్వర శ్లోకం

శివలింగ దర్శనాంతర్గత నందీశ్వర శ్లోకం

వృషస్య వృషణం స్పృష్ట్వా శృంగమధ్యే శివాలయమ్ |
దృష్ట్వా క్షణం నరో యాతి కైలాసే శివ సన్నిధమ్ ||

శ్రీ దేవీచతుఃషష్ట్యుపచారపూజాస్తోత్రమ్

ఉషసి మాగధమంగలగాయనైర్ఝటితి జాగృహి జాగృహి జాగృహి |

అతికృపార్ద్రకటాక్షనిరీక్షణైర్జగదిదం జగదంబ సుఖీకురు || ౧ ||
కనకమయవితర్దిశోభమానం దిశి దిశి పూర్ణసువర్ణకుంభయుక్తమ్ |
మణిమయమంటపమధ్యమేహి మాతర్మయి కృపయాశు సమర్చనం గ్రహీతుమ్ || ౨ ||
కనకకలశశోభమానశీర్షం జలధరలంబి సముల్లసత్పతాకమ్ |
భగవతి తవ సంనివాసహేతోర్మణిమయమందిరమేతదర్పయామి || ౩ ||
తపనీయమయీ సుతూలికా కమనీయా మృదులోత్తరచ్ఛదా |
నవరత్నవిభూషితా మయా శిబికేయం జగదంబ తేఽర్పితా || ౪ ||
కనకమయవితర్దిస్థాపితే తూలికాఢ్యే వివిధకుసుమకీర్ణే కోటిబాలార్కవర్ణే |
భగవతి రమణీయే రత్నసింహాసనేఽస్మిన్ సుపవిశ పదయుగ్మం హేమపీఠే నిధాయ || ౫ ||
మణిమౌక్తికనిర్మితం మహాంతం కనకస్తంభచతుష్టయేన యుక్తమ్ |
కమనీయతమం భవాని తుభ్యం నవముల్లోచమహం సమర్పయామి || ౬ ||
దూర్వయా సరసిజాన్వితవిష్ణుక్రాంతయా చ సహితం కుసుమాఢ్యమ్ |
పద్మయుగ్మసదృశే పదయుగ్మే పాద్యమేతదురరీకురు మాతః || ౭ ||
గంధపుష్పయవసర్షపదూర్వాసంయుతం తిలకుశాక్షతమిశ్రమ్ |
హేమపాత్రనిహితం సహ రత్నైరర్ఘ్యర్మేతదురరీకురు మాతః || ౮ ||
జలజద్యుతినా కరేణ జాతీఫలతక్కోలలవంగగంధయుక్తైః |
అమృతైరమృతైరివాతిశీతైర్భగవత్యాచమనం విధీయతామ్ || ౯ ||
నిహితం కనకస్య సంపుటే పిహితం రత్నపిధానకేన యత్ |
తదిదం జగదంబ తేఽర్పితం మధుపర్కం జనని ప్రగృహ్యతామ్ || ౧౦ ||
ఏతచ్చమ్పకతైలమంబ వివిధైః పుష్పైర్ముహుర్వాసితం
న్యస్తం రత్నమయే సువర్ణచషకే భృంగైర్భ్రమద్భిర్వృతమ్ |
సానందం సురసుందరీభిరభితో హస్తైర్ధృతం తే మయా
కేశేషు భ్రమరభ్రమేషు సకలేష్వంగేషు చాలిప్యతే || ౧౧ ||
మాతః కుంకుమపంకనిర్మితమిదం దేహే తవోద్వర్తనం
భక్త్యాహం కలయామి హేమరజసా సంమిశ్రితం కేసరైః |
కేశానామలకైర్విశోధ్య విశదాంకస్తూరికోదంచితైః
స్నానం తే నవరత్నకుంభసహితైః సంవాసితోష్ణోదకైః || ౧౨ ||
దధిదుగ్ధఘృతైః సమాక్షికైః సితయా శర్కరయా సమన్వితైః |
స్నపయామి తవాహమాదరాజ్జనని త్వాం పునరుష్ణవారిభిః || ౧౩ ||
ఏలోశీరసువాసితైః సకుసుమైర్గంగాది తీర్థోదకైః
మాణిక్యామలమౌక్తికామృతరసైః స్వచ్ఛైః సువర్ణోదకైః |
మంత్రాన్వైదికతాంత్రికాన్పరిపఠంసానందమత్యాదరాత్
స్నానం తే పరికల్పయామి జనని స్నేహాత్త్వమంగీకురు || ౧౪ ||
బాలార్కద్యుతి దాడిమీయకుసుమప్రస్పర్ధి సర్వోత్తమం
మాతస్త్వం పరిధేహి దివ్యవసనం భక్త్యా మయా కల్పితమ్ |
ముక్తాభిర్గ్రథితం సుకంచుకమిదం స్వీకృత్య పీతప్రభం
తప్తస్వర్ణసమానవర్ణమతులం ప్రావర్ణమంగీకురు || ౧౫ ||
నవరత్నమయే మయార్పితే కమనీయే తపనీయపాదుకే |
సవిలాసమిదం పదద్వయం కృపయా దేవి తయోర్నిధీయతామ్ || ౧౬ ||
బహుభిరగరుధూపైః సాదరం ధూపయిత్వా
భగవతి తవ కేశాంకంకతైర్మార్జయిత్వా |
సురభిభిరరవిందైశ్చంపకైశ్చార్చయిత్వా
ఝటితి కనకసూత్రైర్జూటయన్వేష్టయామి || ౧౭ ||
సౌవీరాంజనమిదమంబ చక్షుషోస్తే విన్యస్తం కనకశలాకయా మయా యత్ |
తన్న్యూనం మలినమపి త్వదక్షిసంగాత్ బ్రహ్మేంద్రాద్యభిలషణీయతామియాయ || ౧౮ ||
మంజీరే పదయోర్నిధాయ రుచిరాం విన్యస్య కాంచీం కటౌ
ముక్తాహారమురోజయోరనుపమాం నక్షత్రమాలాం గలే |
కేయూరాణి భుజేషు రత్నవలయశ్రేణీం కరేషు క్రమా-
త్తాటంకే తవ కర్ణయోర్వినిదధే శీర్షే చ చూడామణిమ్ || ౧౯ ||
ధమ్మిల్లే తవ దేవి హేమకుసుమాన్యాధాయ ఫాలస్థలే
ముక్తారాజివిరాజమానతిలకం నాసాపుటే మౌక్తికమ్ |
మాతర్మౌక్తికజాలికాం చ కుచయోః సర్వాంగులీషూర్మికాః
కట్యాం కాంచనకింకిణీర్వినిదధే రత్నావతంసం శ్రుతౌ || ౨౦ ||
మాతః ఫాలతలే తవాతివిమలే కాశ్మీరకస్తూరికా-
కర్పూరాగరుభిః కరోమి తిలకం దేహేఽంగరాగం తతః |
వక్షోజాదిషు యక్షకర్దమరసం సిక్త్వా చ పుష్పద్రవం
పాదౌ చందనలేపనాదిభిరహం సంపూజయామి క్రమాత్ || ౨౧ ||
రత్నాక్షతైస్త్వాం పరిపూజయామి ముక్తాఫలైర్వా రుచిరైరవిద్ధైః |
అఖండితైర్దేవి యవాదిభిర్వా కాశ్మీరపంకాంకితతండులైర్వా || ౨౨ ||
జనని చంపకతలైమిదం పురో మృగమదోపయుతం పటవాసకమ్ |
సురభిగంధమిదం చ చతుఃసమం సపది సర్వమిదం పరిగృహ్యతామ్ || ౨౩ ||
సీమంతే తే భగవతి మయా సాదరం న్యస్తమేతత్
సిందూరం మే హృదయకమలే హర్షవర్షం తనోతి |
బాలాదిత్యద్యుతిరివ సదా లోహితా యస్య కాంతీ-
రంతర్ధ్వాంతం హరతి సకలం చేతసా చింతయైవ || ౨౪ ||
మందారకుందకరవీరలవంగపుష్పైస్త్వాం దేవి సంతతమహం పరిపూజయామి |
జాతీజపావకులచంపకకేతకాదినానావిధాని కుసుమాని చ తేఽర్పయామి || ౨౫ ||
మాలతీవకులహేమపుష్పికాకాంచనారకరవీరకైతకైః |
కర్ణికారగిరికర్ణికాదిభిః పూజయామి జగదంబ తే వపుః || ౨౬ ||
పారిజాతశతపత్రపాటలైర్మల్లికావకులచంపకాదిభిః |
అంబుజైః సుకుసుమైశ్చ సాదరం పూజయామి జగదంబ తే వపుః || ౨౭ ||
లాక్షాసంమిలితైః సితాభ్రసహితైః శ్రీవాససంమిశ్రితైః
కర్పూరాకలితైః శిరైర్మధుయుతైర్గోసర్పిషా లోడితైః |
శ్రీఖండాగరుగుగ్గులుప్రభృతిభిర్నానావిధైర్వస్త్తుభిః
ధూపం తే పరికల్పయామి జనని స్నేహాత్త్వమంగీకురు || ౨౮ ||
రత్నాలంకృతహేమపాత్రనిహితైర్గోసర్పిషా లోడితైః
దీపైర్దీర్ఘతరాంధకారభిదురైర్బాలార్కకోటిప్రభైః |
ఆతామ్రజ్వలదుజ్జ్వలప్రవిలసద్రత్నప్రదీపైస్తథా
మాతస్త్వామహమాదరాదనుదినం నీరాజయామ్యుచ్చకైః || ౨౯ ||
మాతస్త్వాం దధిదుగ్ధపాయసమహాశాల్యన్నసంతానికాః
సూపాపూపసితాఘృతైః సవటకైః సక్షౌద్రరంభాఫలైః |
ఏలాజీరకహింగునాగరనిశాకుస్తుంభరీసంస్కృతైః
శాకైః సాకమహం సుధాధికరసైః సంతర్పయామ్యర్చయన్ || ౩౦ ||
సాపూపసూపదధిదుగ్ధసితాఘృతాని సుస్వాదుభక్తపరమాన్నపురఃసరాణి |
శాకోల్లసన్మరిచిజీరకబాహ్లికాని భక్ష్యాణి భుంక్ష్వ జగదంబ మయార్పితాని || ౩౧ ||
క్షీరమేతదిదముత్తమోత్తమం ప్రాజ్యమాజ్యమిదముజ్జ్వలం మధు |
మాతరేతదమృతోపమం పయః సంభ్రమేణ పరిపీయతాం ముహుః || ౩౨ ||
ఉష్ణోదకైః పాణియుగం ముఖం చ ప్రక్షాల్య మాతః కలధౌతపాత్రే |
కర్పూరమిశ్రేణ సకుంకుమేన హస్తౌ సముద్వర్తయ చందనేన || ౩౩ ||
అతిశీతముశీరవాసితం తపనీయే కలశే నివేశితమ్ |
పటపూతమిదం జితామృతం శుచి గంగాజలమంబ పీయతామ్ || ౩౪ ||
జంబ్వామ్రరంభాఫలసంయుతాని ద్రాక్షాఫలక్షౌద్రసమన్వితాని |
సనారికేలాని సదాడిమాని ఫలాని తే దేవి సమర్పయామి || ౩౫ ||
కూశ్మాండకోశాతకిసంయుతాని జంబీరనారంగసమన్వితాని |
సబీజపూరాణి సబాదరాణి ఫలాని తే దేవి సమర్పయామి || ౩౬ ||
కర్పూరేణ యుతైర్లవంగసహితైస్తక్కోలచూర్ణాన్వితైః
సుస్వాదుక్రముకైః సగౌరఖదిరైః సుస్నిగ్ధజాతీఫలైః |
మాతః కైతకపత్రపాండురుచిభిస్తాంబూలవల్లీదలైః
సానందం ముఖమండనార్థమతులం తాంబూలమంగీకురు || ౩౭ ||
ఏలాలవంగాదిసమన్వితాని తక్కోలకర్పూరవిమిశ్రితాని |
తాంబూలవల్లీదలసంయుతాని పూగాని తే దేవి సమర్పయామి || ౩౮ ||
తాంబూలనిర్జితసుతప్తసువర్ణవర్ణం స్వర్ణాక్తపూగఫలమౌక్తికచూర్ణయుక్తమ్ |
సౌవర్ణపాత్రనిహితం ఖదిరేన సార్ధం తాంబూలమంబ వదనాంబురుహే గృహాణ || ౩౯ ||
మహతి కనకపాత్రే స్థాపయిత్వా విశాలాన్
డమరుసదృశరూపాన్బద్ధగోధూమదీపాన్ |
బహుఘృతమథ తేషు న్యస్య దీపాన్ప్రకృష్టా-
న్భువనజనని కుర్వే నిత్యమారార్తికం తే || ౪౦ ||
సవినయమథ దత్వా జానుయుగ్మం ధరణ్యాం
సపది శిరసి ధృత్వా పాత్రమారార్తికస్య |
ముఖకమలసమీపే తేఽంబ సార్థం త్రివారం
భ్రమయతి మయి భూయాత్తే కృపార్ద్రః కటాక్షః || ౪౧ ||
అథ బహుమణిమిశ్రైర్మౌక్తికైస్త్వాం వికీర్య
త్రిభువనకమనీయైః పూజయిత్వా చ వస్త్రైః |
మిలితవివిధముక్తాం దివ్యమాణిక్యయుక్తాం
జనని కనకవృష్టిం దక్షిణాం తేఽర్పయామి || ౪౨ ||
మాతః కాంచనదండమండితమిదం పూర్ణేందుబింబప్రభం
నానారత్నవిశోభిహేమకలశం లోకత్రయాహ్లాదకమ్ |
భాస్వన్మౌక్తికజాలికాపరివృతం ప్రీత్యాత్మహస్తే ధృతం
ఛత్రం తే పరికల్పయామి శిరసి త్వష్ట్రా స్వయం నిర్మితమ్ || ౪౩ ||
శరదిందుమరీచిగౌరవర్ణైర్మణిముక్తావిలసత్సువర్ణదండైః |
జగదంబ విచిత్రచామరైస్త్వామహమానందభరేణ బీజయామి || ౪౪ ||
మార్తాండమండలనిభో జగదంబ యోఽయం భక్త్యా మయా మణిమయో ముకురోఽర్పితస్తే |
పూర్ణేందుబింబరుచిరం వదనం స్వకీయమస్మిన్విలోకయ విలోలవిలోచనే త్వమ్ || ౪౫ ||
ఇంద్రాదయో నతినతైర్మకుటప్రదీపైర్నీరాజయంతి సతతం తవ పాదపీఠమ్ |
తస్మాదహం తవ సమస్తశరీరమేతన్నీరాజయామి జగదంబ సహస్రదీపైః || ౪౬ ||
ప్రియగతిరతితుంగో రత్నపల్యాణయుక్తః
కనకమయవిభూషః స్నిగ్ధగంభీరఘోషః |
భగవతి కలితోఽయం వాహనార్థం మయా తే
తురగశతసమేతో వాయువేగస్తురంగః || ౪౭ ||
మధుకరవృతకుంభన్యస్తసిందూరరేణుః
కనకకలితఘంటాకింకణీశోభికంఠః |
శ్రవణయుగలచంచచ్చామరో మేఘతుల్యో
జనని తవ ముదే స్యాన్మత్తమాతంగ ఏషః || ౪౮ ||
ద్రుతతరతురగైర్విరాజమానం మణిమయచక్రచతుష్టయేన యుక్తమ్ |
కనకమయమముం వితానవంతం భగవతి తే హి రథం సమర్పయామి || ౪౯ ||
హయగజరథపత్తిశోభమానం దిశి దిశి దుందుభిమేఘనాదయుక్తమ్ |
అతిబహు చతురంగసైన్యమేతద్భగవతి భక్తిభరేణ తేఽర్పయామి || ౫౦ ||
పరిఘీకృతసప్తసాగరం బహుసంపత్సహితం మయాంబ తే విపులమ్ |
ప్రబలం ధరణీతలాభిధం దృఢదుర్గం నిఖిలం సమర్పయామి || ౫౧ ||
శతపత్రయుతైః స్వభావశీతైరతిసౌరభ్యయుతైః పరాగపీతైః |
భ్రమరీముఖరీకృతైరనంతైర్వ్యజనైస్త్వాం జగదంబ వీజయామి || ౫౨ ||
భ్రమరలులితలోలకుంతలాలీవిగలితమాల్యవికీర్ణరంగభూమిః |
ఇయమతిరుచిరా నటీ నటంతీ తవ హృదయే ముదమాతనోతు మాతః || ౫౩ ||
ముఖనయనవిలాసలోలవేణీవిలసితనిర్జితలోలభృంగమాలాః |
యువజనసుఖకారిచారులీలా భగవతి తే పురతో నటంతి బాలాః || ౫౪ ||
భ్రమదలికులతుల్యాలోలధమ్మిల్లభారాః స్మితముఖకమలోద్యద్దివ్యలావణ్యపూరాః |
అనుపమితసువేషా వారయోషా నటంతి పరభృతకలకంఠ్యో దేవి దైన్యం ధునోతు || ౫౫ ||
డమరుడిండిమజర్ఝరఝల్లరీమృదురవద్రగడద్ద్రగడాదయః |
ఝటితి ఝాంకృతఝాంకృతఝాంకృతైర్బహుదయం హృదయం సుఖయంతు తే || ౫౬ ||
విపంచీషు సప్తస్వరాన్వాదయంత్యస్తవ ద్వారి గాయంతి గంధర్వకన్యాః |
క్షణం సావధానేన చిత్తేన మాతః సమాకర్ణయ త్వం మయా ప్రార్థితాసి || ౫౭ ||
అభినయకమనీయైర్నర్తనైర్నర్తకీనాం
క్షణమపి రమయిత్వా చేత ఏతత్త్వదీయమ్ |
స్వయమహమతిచిత్రైర్నృత్తవాదిత్రగీతై-
ర్భగవతి భవదీయం మానసం రంజయామి || ౫౮ ||
తవ దేవి గుణానువర్ణనే చతురా నో చతురాననాదయః |
తదిహైకముఖేషు జంతుషు స్తవనం కస్తవ కర్తుమీశ్వరః || ౫౯ ||
పదే పదే యత్పరిపూజకేభ్యః సద్యోఽశ్వమేధాదిఫలం దదాతి |
తత్సర్వపాపక్షయహేతుభూతం ప్రదక్షిణం తే పరితః కరోమి || ౬౦ ||
రక్తోత్పలారక్తలతాప్రభాభ్యాం ధ్వజోర్ధ్వరేఖాకులిశాంకితాభ్యామ్ |
అశేషబృందారకవందితాభ్యాం నమో భవానీపదపంకజాభ్యామ్ || ౬౧ ||
చరణనలినయుగ్మం పంకజైః పూజయిత్వా
కనకకమలమాలాం కంఠదేశేఽర్పయిత్వా |
శిరసి వినిహితోఽయం రత్నపుష్పాంజలిస్తే
హృదయకమలమధ్యే దేవి హర్షం తనోతు || ౬౨ ||
అథ మణిమయంచకాభిరామే కనకమయవితానరాజమానే |
ప్రసరదగరుధూపధూపితేఽస్మిన్భగవతి భవనేఽస్తు తే నివాసః || ౬౩ ||
ఏతస్మిన్మణిఖచితే సువర్ణపీఠే త్రైలోక్యాభయవరదౌ నిధాయ హస్తౌ |
విస్తీర్ణే మృదులతరోత్తరచ్ఛదేఽస్మిన్పర్యంకే కనకమయే నిషీద మాతః || ౬౪ ||
తవ దేవి సరోజచిహ్నయోః పదయోర్నిర్జితపద్మరాగయోః |
అతిరక్తతరైరలక్తకైః పునరుక్తాం రచయామి రక్తతామ్ || ౬౫ ||
అథ మాతరుశీరవాసితం నిజతాంబూలరసేన రంజితమ్ |
తపనీయమయే హి పట్టకే ముఖగండూషజలం విధీయతామ్ || ౬౬ ||
క్షణమథ జగదంబ మంచకేఽస్మిన్మృదుతలతూలికయా విరాజమానే |
అతిరహసి ముదా శివేన సార్ధం సుఖశయనం కురు తత్ర మాం స్మరంతీ || ౬౭ ||
ముక్తాకుందేందుగౌరాం మణిమయకుటాం రత్నతాటంకయుక్తా-
మక్షస్రక్పుష్పహస్తామభయవరకరాం చంద్రచూడాం త్రినేత్రామ్ |
నానాలంకారయుక్తాం సురమకుటమణిద్యోతితస్వర్ణపీఠాం
సానందాం సుప్రసన్నాం త్రిభువనజననీం చేతసా చింతయామి || ౬౮ ||
ఏషా భక్త్యా తవ విరచితా యా మయా దేవి పూజా
స్వీకృత్యైనాం సపది సకలాన్మేఽపరాధాంక్షమస్వ |
న్యూనం యత్తత్తవ కరుణయా పూర్ణతామేతు సద్యః
సానందం మే హృదయకమలే తేఽస్తు నిత్యం నివాసః || ౬౯ ||
పూజామిమాం యః పఠతి ప్రభాతే మధ్యాహ్నకాలే యది వా ప్రదోషే |
ధర్మార్థకామాన్పురుషోఽభ్యుపైతి దేహావసానే శివభావమేతి || ౭౦ ||
పూజామిమాం పఠేన్నిత్యం పూజాం కర్తుమనీశ్వరః |
పూజాఫలమవాప్నోతి వాంఛితార్థం చ విందతి || ౭౧ ||
ప్రత్యహం భక్తిసంయుక్తో యః పూజనమిదం పఠేత్ |
వాగ్వాదిన్యాః ప్రసాదేన వత్సరాత్స కవిర్భవేత్ || ౭౨ ||
ఇతి శ్రీమత్పరమహంసపరివ్రాజకాచార్యస్య
శ్రీగోవిందభగవత్పూజ్యపాదశిష్యస్య
శ్రీమచ్ఛంకరభగవతః కృతౌ
దేవీచతుఃషష్ట్యుపచారపూజాస్తోత్రం సంపూర్ణమ్ ||

మంత్రమాతృకాపుష్పమాలాస్తవః

కల్లోలోల్లసితామృతాబ్ధిలహరీమధ్యే విరాజన్మణి-

ద్వీపే కల్పకవాటికాపరివృతే కాదంబవాట్యుజ్జ్వలే |
రత్నస్తంభసహస్రనిర్మితసభామధ్యే విమానోత్తమే
చింతారత్నవినిర్మితం జనని తే సింహాసనం భావయే || ౧ ||
ఏణాంకానలభానుమండలలసచ్ఛ్రీచక్రమధ్యే స్థితాం
బాలార్కద్యుతిభాసురాం కరతలైః పాశాంకుశౌ బిభ్రతీమ్ |
చాపం బాణమపి ప్రసన్నవదనాం కౌసుంభవస్త్రాన్వితాం
తాం త్వాం చంద్రకళావతంసమకుటాం చారుస్మితాం భావయే || ౨ ||
ఈశానాదిపదం శివైకఫలదం రత్నాసనం తే శుభం
పాద్యం కుంకుమచందనాదిభరితైరర్ఘ్యం సరత్నాక్షతైః |
శుద్ధైరాచమనీయకం తవ జలైర్భక్త్యా మయా కల్పితం
కారుణ్యామృతవారిధే తదఖిలం సంతుష్టయే కల్పతామ్ || ౩ ||
లక్ష్యే యోగిజనస్య రక్షితజగజ్జాలే విశాలేక్షణే
ప్రాలేయాంబుపటీరకుంకుమలసత్కర్పూరమిశ్రోదకైః |
గోక్షీరైరపి నారికేలసలిలైః శుద్ధోదకైర్మంత్రితైః
స్నానం దేవి ధియా మయైతదఖిలం సంతుష్టయే కల్పతామ్ || ౪ ||
హ్రీంకారాంకితమంత్రలక్షితతనో హేమాచలాత్సంచితై
రత్నైరుజ్జ్వలముత్తరీయసహితం కౌసుంభవర్ణాంశుకమ్ |
ముక్తాసంతతియజ్ఞసూత్రమమలం సౌవర్ణతంతూద్భవం
దత్తం దేవి ధియా మయైతదఖిలం సంతుష్టయే కల్పతామ్ || ౫ ||
హంసైరప్యతిలోభనీయగమనే హారావలీముజ్జ్వలాం
హిందోలద్యుతిహీరపూరితతరే హేమాంగదే కంకణే |
మంజీరౌ మణికుండలే మకుటమప్యర్ధేందుచూడామణిం
నాసామౌక్తికమంగులీయకటకౌ కాంచీమపి స్వీకురు || ౬ ||
సర్వాంగే ఘనసారకుంకుమఘనశ్రీగంధపంకాంకితం
కస్తూరీతిలకం చ ఫాలఫలకే గోరోచనాపత్రకమ్ |
గండాదర్శనమండలే నయనయోర్దివ్యాంజనం తేఽంచితం
కంఠాబ్జే మృగనాభిపంకమమలం త్వత్ప్రీతయే కల్పతామ్ || ౭ ||
కల్హారోత్పలమల్లికామరువకైః సౌవర్ణపంకేరుహై-
ర్జాతీచంపకమాలతీవకులకైర్మందారకుందాదిభిః |
కేతక్యా కరవీరకైర్బహువిధైః క్లుప్తాః స్రజో మాలికాః
సంకల్పేన సమర్పయామి వరదే సంతుష్టయే గృహ్యతామ్ || ౮ ||
హంతారం మదనస్య నందయసి యైరంగైరనంగోజ్జ్వలై-
ర్యైర్భృంగావలినీలకుంతలభరైర్బధ్నాసి తస్యాశయమ్ |
తానీమాని తవాంబ కోమలతరాణ్యామోదలీలాగృహా-
ణ్యామోదాయ దశాంగగుగ్గులుఘృతైర్ధూపైరహం ధూపయే || ౯ ||
లక్ష్మీముజ్జ్వలయామి రత్ననివహోద్భాస్వత్తరే మందిరే
మాలారూపవిలంబితైర్మణిమయస్తంభేషు సంభావితైః |
చిత్రైర్హాటకపుత్రికాకరధృతైర్గవ్యైర్ఘృతైర్వర్ధితై-
ర్దివ్యైర్దీపగణైర్ధియా గిరిసుతే సంతుష్టయే కల్పతామ్ || ౧౦ ||
హ్రీంకారేశ్వరి తప్తహాటకకృతైః స్థాలీసహస్రైర్భృతం
దివ్యాన్నం ఘృతసూపశాకభరితం చిత్రాన్నభేదం తథా |
దుగ్ధాన్నం మధుశర్కరాదధియుతం మాణిక్యపాత్రే స్థితం
మాషాపూపసహస్రమంబ సఫలం నైవేద్యమావేదయే || ౧౧ ||
సచ్ఛాయైర్వరకేతకీదలరుచా తాంబూలవల్లీదలైః
పూగైర్భూరిగుణైః సుగంధిమధురైః కర్పూరఖండోజ్జ్వలైః |
ముక్తాచూర్ణవిరాజితైర్బహువిధైర్వక్త్రాంబుజామోదనైః
పూర్ణా రత్నకలాచికా తవ ముదే న్యస్తా పురస్తాదుమే || ౧౨ ||
కన్యాభిః కమనీయకాంతిభిరలంకారామలారార్తికా
పాత్రే మౌక్తికచిత్రపంక్తివిలసత్కర్పూరదీపాలిభిః |
తత్తత్తాలమృదంగగీతసహితం నృత్యత్పదాంభోరుహం
మంత్రారాధనపూర్వకం సువిహితం నీరాజనం గృహ్యతామ్ || ౧౩ ||
లక్ష్మీర్మౌక్తికలక్షకల్పితసితచ్ఛత్త్రం తు ధత్తే రసా-
దింద్రాణీ చ రతిశ్చ చామరవరే ధత్తే స్వయం భారతీ |
వీణామేణవిలోచనాః సుమనసాం నృత్యంతి తద్రాగవ-
ద్భావైరాంగికసాత్త్వికైః స్ఫుటరసం మాతస్తాదాకర్ణ్యతామ్ || ౧౪ ||
హ్రీంకారత్రయసంపుటేన మనునోపాస్యే త్రయీమౌలిభి-
ర్వాక్యైర్లక్ష్యతనో తవ స్తుతివిధౌ కో వా క్షమేతాంబికే |
సల్లాపాః స్తుతయః ప్రదక్షిణశతం సంచార ఏవాస్తు తే
సంవేశో నమసః సహస్రమఖిలం త్వత్ప్రీతయే కల్పతామ్ || ౧౫ ||
శ్రీమంత్రాక్షరమాలయా గిరిసుతాం యః పూజయేంచేతసా
సంధ్యాసు ప్రతివాసరం సునియతస్తస్యామలం స్యాన్మనః |
చిత్తాంభోరుహమంటపే గిరిసుతా నృత్తం విధత్తే రసా-
ద్వాణీ వక్త్రసరోరుహే జలధిజా గేహే జగన్మంగళా || ౧౬ ||
ఇతి గిరివరపుత్రీపాదరాజీవభూషా
భువనమమలయంతీ సూక్తిసౌరభ్యసారైః |
శివపదమకరందస్యందినీయం నిబద్ధా
మదయతు కవిభృంగాన్మాతృకాపుష్పమాలా || ౧౭ ||

అపరాజితా స్తోత్రమ్

 (దుర్గామాహాత్మ్య అంతర్గతం)
నమో దేవ్యై మహాదేవ్యై శివాయై సతతం నమః |
నమః ప్రకృత్యై భద్రాయై నియతాః ప్రణతాః స్మతామ్ || ౧ ||
రౌద్రాయై నమో నిత్యాయై గౌర్యై ధాత్ర్యై నమో నమః |
జ్యోత్స్నాయై చేన్దురూపిణ్యై సుఖాయై సతతం నమః || ౨ ||
కల్యాణ్యై ప్రణతా వృద్ధ్యై సిద్ధ్యై కుర్మో నమో నమః |
నైరృత్యై భూభృతాం లక్ష్మ్యై శర్వాణ్యై తే నమో నమః || ౩ ||
దుర్గాయై దుర్గపారాయై సారాయై సర్వకారిణ్యై |
ఖ్యాత్యై తథైవ కృష్ణాయై ధూమ్రాయై సతతం నమః || ౪ ||
అతిసౌమ్యాతిరౌద్రాయై నతాస్తస్యై నమో నమః |
నమో జగత్ప్రతిష్ఠాయై దేవ్యై కృత్యై నమో నమః || ౫ ||
యా దేవీ సర్వభూతేషు విష్ణుమాయేతి శబ్దితా |
నమస్తస్యై నమస్తస్యై నమస్తస్యై నమో నమః || ౬ ||
యా దేవీ సర్వభూతేషు చేతనేత్యభిధీయతే |
నమస్తస్యై నమస్తస్యై నమస్తస్యై నమో నమః || ౭ ||
యా దేవీ సర్వభూతేషు బుద్ధిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౮ ||
యా దేవీ సర్వభూతేషు నిద్రారూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౯ ||
యా దేవీ సర్వభూతేషు క్షుధారూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౦ ||
యా దేవీ సర్వభూతేషు ఛాయారూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౧ ||
యా దేవీ సర్వభూతేషు శక్తిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౨ ||
యా దేవీ సర్వభూతేషు తృష్ణారూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౩ ||
యా దేవీ సర్వభూతేషు క్షాంతిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౪ ||
యా దేవీ సర్వభూతేషు జాతిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౫ ||
యా దేవీ సర్వభూతేషు లజ్జారూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౬ ||
యా దేవీ సర్వభూతేషు శాంతిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౭ ||
యా దేవీ సర్వభూతేషు శ్రద్ధారూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౮ ||
యా దేవీ సర్వభూతేషు కాంతిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౧౯ ||
యా దేవీ సర్వభూతేషు లక్ష్మీరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౨౦ ||
యా దేవీ సర్వభూతేషు వృత్తిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౨౧ ||
యా దేవీ సర్వభూతేషు స్మృతిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౨౨ ||
యా దేవీ సర్వభూతేషు దయారూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౨౩ ||
యా దేవీ సర్వభూతేషు తుష్టిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౨౪ ||
యా దేవీ సర్వభూతేషు మాతృరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౨౫ ||
యా దేవీ సర్వభూతేషు భ్రాంతిరూపేణ సంస్థితా |
నమస్తస్యై నమస్తస్యై నమస్తస్యై నమో నమః || ౨౬ ||
ఇంద్రియాణామధిష్ఠాత్రీ భూతానాం చాఖిలేషు యా |
భూతేషు సతతం తస్యై వ్యాప్త్యై దేవ్యై నమో నమః || ౨౭ ||
చితిరూపేణ యా కృత్స్నమేతద్ వ్యాప్య స్థితా జగత్ |
నమస్తస్యై నమస్తస్యై నమస్తస్యై నమో నమః || ౨౮ ||

దేవీ మహాత్మ్యమ్ చామున్డేశ్వరీ మన్గళమ్

రచన: ఋషి మార్కండేయ

శ్రీ శైలరాజ తనయే చండ ముండ నిషూదినీ
మృగేంద్ర వాహనే తుభ్యం చాముండాయై సుమంగళం|1|
పంచ వింశతి సాలాడ్య శ్రీ చక్రపుఅ నివాసినీ
బిందుపీఠ స్థితె తుభ్యం చాముండాయై సుమంగళం||2||
రాజ రాజేశ్వరీ శ్రీమద్ కామేశ్వర కుటుంబినీం
యుగ నాధ తతే తుభ్యం చాముండాయై సుమంగళం||3||
మహాకాళీ మహాలక్ష్మీ మహావాణీ మనోన్మణీ
యోగనిద్రాత్మకే తుభ్యం చామూండాయై సుమంగళం||4||
మత్రినీ దండినీ ముఖ్య యోగినీ గణ సేవితే|
భండ దైత్య హరే తుభ్యం చామూండాయై సుమంగళం||5||
నిశుంభ మహిషా శుంభే రక్తబీజాది మర్దినీ
మహామాయే శివేతుభ్యం చామూండాయై సుమంగళం||
కాళ రాత్రి మహాదుర్గే నారాయణ సహోదరీ
వింధ్య వాసినీ తుభ్యం చామూండాయై సుమంగళం||
చంద్ర లేఖా లసత్పాలే శ్రీ మద్సింహాసనేశ్వరీ
కామేశ్వరీ నమస్తుభ్యం చామూండాయై సుమంగళం||
ప్రపంచ సృష్టి రక్షాది పంచ కార్య ధ్రంధరే
పంచప్రేతాసనే తుభ్యం చామూండాయై సుమంగళం||
మధుకైటభ సంహత్రీం కదంబవన వాసినీ
మహేంద్ర వరదే తుభ్యం చామూండాయై సుమంగళం||
నిగమాగమ సంవేద్యే శ్రీ దేవీ లలితాంబికే
ఓడ్యాణ పీఠగదే తుభ్యం చామూండాయై సుమంగళం||12||
పుణ్దేషు ఖండ దండ పుష్ప కంఠ లసత్కరే
సదాశివ కలే తుభ్యం చామూండాయై సుమంగళం||12||
కామేశ భక్త మాంగల్య శ్రీమద్ త్రిపుర సుందరీ|
సూర్యాగ్నిందు త్రిలోచనీ తుభ్యం చామూండాయై సుమంగళం||13||
చిదగ్ని కుండ సంభూతే మూల ప్రకృతి స్వరూపిణీ
కందర్ప దీపకే తుభ్యం చామూండాయై సుమంగళం||14||
మహా పద్మాటవీ మధ్యే సదానంద ద్విహారిణీ
పాసాంకుశ ధరే తుభ్యం చామూండాయై సుమంగళం||15||
సర్వమంత్రాత్మికే ప్రాఙ్ఞే సర్వ యంత్ర స్వరూపిణీ
సర్వతంత్రాత్మికే తుభ్యం చామూండాయై సుమంగళం||16||
సర్వ ప్రాణి సుతే వాసే సర్వ శక్తి స్వరూపిణీ
సర్వా భిష్ట ప్రదే తుభ్యం చామూండాయై సుమంగళం||17||
వేదమాత మహారాఙ్ఞీ లక్ష్మీ వాణీ వశప్రియే
త్రైలోక్య వందితే తుభ్యం చామూండాయై సుమంగళం||18||
బ్రహ్మోపేంద్ర సురేంద్రాది సంపూజిత పదాంబుజే
సర్వాయుధ కరే తుభ్యం చామూండాయై సుమంగళం||19||
మహావిధ్యా సంప్రదాయై సవిధ్యేనిజ వైబహ్వే|
సర్వ ముద్రా కరే తుభ్యం చామూండాయై సుమంగళం||20||
ఏక పంచాశతే పీఠే నివాసాత్మ విలాసినీ
అపార మహిమే తుభ్యం చామూండాయై సుమంగళం||21||
తేజో మయీదయాపూర్ణే సచ్చిదానంద రూపిణీ
సర్వ వర్ణాత్మికే తుభ్యం చామూండాయై సుమంగళం||22||
హంసారూఢే చతువక్త్రే బ్రాహ్మీ రూప సమన్వితే
ధూమ్రాక్షస్ హంత్రికే తుభ్యం చామూండాయై సుమంగళం||23||
మాహేస్వరీ స్వరూపయై పంచాస్యై వృషభవాహనే|
సుగ్రీవ పంచికే తుభ్యం చామూండాయై సుమంగళం||24||
మయూర వాహే ష్ట్ వక్త్రే కౌమరీ రూప శోభితే
శక్తి యుక్త కరే తుభ్యం చామూండాయై సుమంగళం||
పక్షిరాజ సమారూఢే శంఖ చక్ర లసత్కరే|
వైష్నవీ సంఙ్ఞికే తుభ్యం చామూండాయై సుమంగళం||
వారాహీ మహిషారూఢే ఘోర రూప సమన్వితే
దంష్త్రాయుధ ధరె తుభ్యం చామూండాయై సుమంగళం||
గజేంద్ర వాహనా రుఢే ఇంద్రాణీ రూప వాసురే
వజ్రాయుధ కరె తుభ్యం చామూండాయై సుమంగళం||
చతుర్భుజె సింహ వాహే జతా మండిల మండితే
చండికె శుభగే తుభ్యం చామూండాయై సుమంగళం||
దంశ్ట్రా కరాల వదనే సింహ వక్త్రె చతుర్భుజే
నారసింహీ సదా తుభ్యం చామూండాయై సుమంగళం||
జ్వల జిహ్వా కరాలాస్యే చండకోప సమన్వితే
జ్వాలా మాలినీ తుభ్యం చామూండాయై సుమంగళం||
భృగిణే దర్శితాత్మీయ ప్రభావే పరమేస్వరీ
నన రూప ధరే తుభ్య చామూండాయై సుమంగళం||
గణేశ స్కంద జననీ మాతంగీ భువనేశ్వరీ
భద్రకాళీ సదా తుబ్యం చామూండాయై సుమంగళం||
అగస్త్యాయ హయగ్రీవ ప్రకటీ కృత వైభవే
అనంతాఖ్య సుతే తుభ్యం చామూండాయై సుమంగళం||
||ఇతి శ్రీ చాముండేశ్వరీ మంగళం సంపూర్ణం||

13.ఆంజనేయ యంత్రము - మంత్రము

శ్రీ సూర్య సహస్రనామ స్తోత్రమ్

. అథ భవిష్యపురాణాన్తర్గత- సూర్యసహస్రనామస్తోత్రమ్ .
ఓం విశ్వజిద్ విశ్వజిత్కర్తా విశ్వాత్మా విశ్వతోముఖః .
విశ్వేశ్వరో విశ్వయోనిర్నియతాత్మా జితేన్ద్రియః .. ౧..
కాలాశ్రయః కాలకర్తా కాలహా కాలనాశనః .
మహాయోగీ మహాబుద్ధిర్మహాత్మా సుమహాబలః .. ౨..
ప్రభుర్విభుర్భూతనాథో భూతాత్మా భువనేశ్వరః .
భూతభవ్యో భావితాత్మా భూతాన్తఃకరణః శివః .. ౩..
శరణ్యః కమలానన్దో నన్దనో నన్దవర్ధనః .
వరేణ్యో వరదో యోగీ సుసంయుక్తః ప్రకాశకః .. ౪..
వాక్ప్రాణః పరమః ప్రాణః ప్రీతాత్మా ప్రియతః ప్రియః .
నయః సహస్రపాత్ సాధుర్దివ్యకుణ్డలమణ్డితః .. ౫..
అవ్యఙ్గధారీ ధీరాత్మా ప్రచేతా వాయువాహనః .
సమాహితమతిర్ధాతా విధాతా కృతమఙ్గలః .. ౬..
కపర్దీ కల్పకృద్రుద్రః సుమనా ధర్మవత్సలః .
సమాయుక్తో విముక్తాత్మా కృతాత్మా కృతినాంవరః .. ౭..
అవిచిన్త్యవపుః శ్రేష్ఠో మహాయోగీ మహేశ్వరః .
కాన్తః కామాదిరాదిత్యో నియతాత్మా నిరాకులః .. ౮..
కామః కారుణికః కర్తా కమలాకరబోధనః .
సప్తసప్తిరచిన్త్యాత్మా మహాకారుణికోత్తమః .. ౯..
సంజీవనో జీవనాథో జగజ్జీవో జగత్పతిః .
అజయో విశ్వనిలయః సంవిభాగో వృషధ్వజః .. ౧౦..
వృషాకపిః కల్పకర్తా కల్పాన్తకరణో రవిః .
ఏకచక్రరథో మౌనీ సురథో రథినాంవరః .. ౧౧..
అక్రోధనో రశ్మిమాలీ తేజోరాశిర్విభావసుః .
దివ్యకృద్ దినకృద్ దేవో దేవదేవో దివస్పతిః .. ౧౨..
ధీరానాథో హవిర్హోతా దివ్యబాహుర్దివాకరః .
యజ్ఞో యజ్ఞపతిః పూషా స్వర్ణరేతాః పరావహః .. ౧౩..
పరాపరజ్ఞస్ తరణిరంశుమాలీ మనోహరః .
ప్రాజ్ఞః ప్రజాపతిః సూర్యః సవితా విష్ణురంశుమాన్ .. ౧౪..
సదాగతిర్గన్ధబాహుర్విహితో విధిరాశుగః .
పతఙ్గః పతగః స్థాణుర్విహఙ్గో విహగో వరః .. ౧౫..
హర్యశ్వో హరితాశ్వశ్చ హరిదశ్వో జగత్ప్రియః .
త్ర్యంబకః సర్వదమనో భావితాత్మా భిషగ్వరః .. ౧౬..
ఆలోకకృల్లోకనాథో లోకాలోకనమస్కృతః .
కాలః కల్పాన్తకో వహ్నిస్తపనః సమ్ప్రతాపనః .. ౧౭..
విరోచనో విరూపాక్షః సహస్రాక్షః పురందరః .
సహస్రరశ్మిర్మిహిరో వివిధామ్బరభూషణః .. ౧౮..
ఖగః ప్రతర్దనో ధన్యో హయగో వాగ్విశారదః .
శ్రీమాంశ్చ శిశిరో వాగ్మీ శ్రీపతిః శ్రీనికేతనః .. ౧౯..
శ్రీకణ్ఠః శ్రీధరః శ్రీమాన్ శ్రీనివాసో వసుప్రదః .
కామచారో మహామాయో మహేశో విదితాశయః .. ౨౦..
తీర్థక్రియావాన్ సునయో విభవో భక్తవత్సలః .
కీర్తిః కీర్తికరో నిత్యః కుణ్డలీ కవచీ రథీ .. ౨౧..
హిరణ్యరేతాః సప్తాశ్వః ప్రయతాత్మా పరంతపః .
బుద్ధిమాన్ అమరశ్రేష్ఠో రోచిష్ణుః పాతశాసనః .. ౨౨..
సముద్రో ధనదో ధాతా మాన్ధాతా కశ్మలాపహః .
తమోఘ్నో ధ్వాన్తహా వహ్నిర్హోతాన్తఃకరణో గుహః .. ౨౩..
పశుమాన్ ప్రయతానన్దో భూతేశః శ్రీమతాంవరః .
నిత్యోఽదితో నిత్యరథః సురేశః సురపూజితః .. ౨౪..
అజితో విజయో జేతా జఙ్గమస్థావరాత్మకః .
జీవానన్దో నిత్యకామీ విజేతా విజయప్రదః .. ౨౫..
పర్జన్యోఽగ్నిః స్థితిస్థేయః స్థవిరోఽణుర్నిరఞ్జనః .
ప్రద్యోతనో రథారూఢః సర్వలోకప్రకాశకః .. ౨౬..
ధ్రువో మేధీ మహావీర్యో హంసః సంసారతారకః .
సృష్టికర్తా క్రియాహేతుర్మార్తణ్డో మరుతాంపతిః .. ౨౭..
మరుత్వాన్ దహనః స్పష్టా భగో భాగ్యోఽర్యమాపతిః .
వరుణాంశో జగన్నాథః కృతకృత్యః సులోచనః .. ౨౮..
వివస్వాన్ భానుమాన్ కార్యకారణం తేజసాంనిధిః .
అసఙ్గవామీ తిగ్మాంశుర్ధర్మాదిర్దీప్తదీధితిః .. ౨౯..
సహస్రదీధితిర్భఘ్నః సహస్రాంశుర్దివాకరః .
గభస్తిమాన్ దీధితిమాన్ స్రగ్విమాన్ అతులద్యుతిః .. ౩౦..
భాస్కరః సురకార్యజ్ఞః సర్వజ్ఞస్ తీక్ష్ణదీధితిః .
సురజ్యేష్ఠః సురపతిర్బహుజ్ఞోవచసాంపతిః .. ౩౧..
తేజోనిధిర్బృహత్తేజా బృహత్కీర్తిర్బృహస్పతిః .
అహిమానూర్జితో ధీమాన్ ఆముక్తః కీర్తివర్ధనః .. ౩౨..
మహావైద్యాగ్రేణపతిర్గణేశో గణనాయకః .
తీవ్రప్రతాపనస్ తాపీ తాపనో విశ్వతాపనః .. ౩౩..
కార్తస్వరో హృషీకేశః పద్మానన్దోఽభినన్దితః .
పద్మనాభోఽమృతాహారః స్థితిమాన్ కేతుమాన్ నభః .. ౩౪..
అనాద్యన్తోఽచ్యుతో విశ్వో విశ్వామిత్రో ఘృణీ విరాట్ .
ఆముక్తః కవచీ వాగ్మీ కఞ్చుకీ విశ్వభావనః .. ౩౫..
అనిమిత్తగతిః శ్రేష్ఠః శరణ్యః సర్వతోముఖః .
విగాహీరేణురసహః సమాయుక్తః సమాహితః .. ౩౬..
ధర్మకేతుర్ధర్మరతిః సంహర్తా సంయమోయమః .
ప్రణతార్తిహరో వాదీ సిద్ధకార్యో జనేశ్వరః .. ౩౭..
నభో విగాహనః సత్యః స్థామసః సుమనో హరః .
హారీ హరిర్హరో వాయురృతుః కాలానలద్యుతిః .. ౩౮..
సుఖసేవ్యో మహాతేజా జగతామన్తకారణమ్ .
మహేన్ద్రో విష్టుతః స్తోత్రం స్తుతిహేతుః ప్రభాకరః .. ౩౯..
సహస్రకల ఆయుష్మాన్ అరోషః సుఖదః సుఖీ .
వ్యాధిహా సుఖదః సౌఖ్యం కల్యాణః కల్పినాంవరః .. ౪౦..
ఆరోగ్యకర్మణాం సిద్ధిర్వృద్ధిరృద్ధిరహస్పతిః .
హిరణ్యరేతా ఆరోగ్యం విద్వాన్ బన్ధుర్బుధో మహాన్ .. ౪౧..
ప్రణవాన్ ధృతిమాన్ ధర్మో ధర్మకర్తా రుచిప్రదః .
సర్వప్రియః సర్వసహః సర్వశత్రునివారుణః .. ౪౨..
ప్రాంశుర్విద్యోతనో ద్యోతః సహస్రకిరణః కృతిః .
కేయూరభూషణోద్భాసీ భాసితో భాసనోఽనలః .. ౪౩..
శరణ్యార్తిహరో హోతా ఖద్యోతః ఖగసత్తమః .
సర్వద్యోతోఽమవద్ద్యోతః సర్వద్యుతికరోఽమలః .. ౪౪..
కల్యాణః కల్యాణకరః కల్పః కల్పకరః కవిః .
కల్యాణకృత్ కల్పవపుః సర్వకల్యాణభాజనః .. ౪౫..
శాన్తిప్రియః ప్రసన్నాత్మా ప్రశాన్తః ప్రశమప్రియః .
ఉదారకర్మా సునయః సువర్చా వర్చసోజ్జ్వలః .. ౪౬..
వర్చస్వీ వర్చసామీశస్ త్రైలోక్యేశో వశానుగః .
తేజస్వీ సుయశావర్ణిర్వర్ణాధ్యక్షో బలిప్రియః .. ౪౭..
యశస్వీ వేదనిలయస్ తేజస్వీ ప్రకృతిస్థితః .
ఆకాశగః శీఘ్రగతిరాశుగః శ్రుతిమాన్ ఖగః .. ౪౮..
గోపతిర్గ్రహదేవేశో గోమాన్ ఏకః ప్రభఞ్జనః .
జనితాప్రజగణ్డీవో దీపః సర్వప్రకాశకః .. ౪౯..
కర్మసాక్షీ యోగనిత్యో నభస్వాన్ అసురాన్తకః .
రక్షోఘ్నో విఘ్నశమనః కిరీటీ సుమనఃప్రియః .. ౫౦..
మరీచిమాలీ సుమతిః కృతాతిథ్యోఽవిశేషతః .
శిష్టాచారః శుభాకారః స్వాచారా చారతత్పరః .. ౫౧..
మన్దారో మాఠరో రేణుః క్షోభణః పక్షిణాఙ్గురుః .
స్వవిశిష్టో విశిష్టాత్మా విధేయో జ్ఞానశోభనః .. ౫౨..
మహాశ్వేతా ప్రియో జ్ఞేయః సామగో మోదదాయకః .
సర్వవేదప్రగీతాత్మా సర్వవేదో గయాలయః .. ౫౩..
వేదమూర్తిశ్చతుర్వేదో వేదభృద్ వేదపారగః .
క్రియావాన్ అతిరోచిష్ణుర్వరీయాంశ్చ వరప్రదః .. ౫౪..
వ్రతధారీ వ్రతధరో లోకబన్ధురలంకృతః .
అలంకారాక్షరో దివ్యవిద్యావాన్ విదితాశయః .. ౫౫..
అకారో భూషణో భూష్యో భూష్ణుర్భవనపూజితః .
చక్రపాణిర్వజ్రధరః సువేశో లోకవత్సలః .. ౫౬..
రాజ్ఞీపతిర్మహాబాహుః ప్రకృతిర్వికృతిర్గుణః .
అన్ధకారాపహః శ్రేష్ఠో యుగావర్తో యుగాదికృత్ .. ౫౭..
అప్రమేయః సదాయోగీ నిరహంకార ఈశ్వరః .
శుభప్రదః శుభశోభా శుభకర్మా శుభాస్పదః .. ౫౮..
సత్యవాన్ ధృతిమాన్ అర్చ్యో హ్యకారో వృద్ధిదోఽనలః .
బలభృద్ బలగో బన్ధుర్బలవాన్ హరిణాంవరః .. ౫౯..
అనఙ్గోఽనాగరాణిన్ద్రః పద్మయోనిర్గణేశ్వరః .
సంవత్సర ఋతుర్నేతా కాలచక్రప్రవర్తకః .. ౬౦..
పద్మేక్షరః పద్మయోనిః ప్రభవోఽనసరద్యుతిః .
సుమూర్తిః సుమతిః సోమో గోవిన్దో జగదాదిజః .. ౬౧..
పీతవాసాః కృష్ణవాసా దిగ్వాసాతీన్ద్రియో హరిః .
అతీన్ద్రోఽనేకరూపాత్మా స్కన్దః పరపురంజయః .. ౬౨..
శక్తిమాన్ సూరధృగ్ భాస్వాన్ మోక్షహేతురయోనిజః .
సర్వదర్శోఽదితో దర్శో దుఃస్వప్నాశుభనాశనః .. ౬౩..
మాఙ్గల్యకర్తా కరణిర్వేగవాన్ కశ్మలాపహః .
స్పష్టాక్షరో మహామన్త్రో విశాఖో యజనప్రియః .. ౬౪..
విశ్వకర్మా మహాశక్తిర్జ్యోతిరీశవిహంగమః .
విచక్షణో దక్ష ఇన్ద్రః ప్రత్యూహః ప్రియదర్శనః .. ౬౫..
అశ్వినౌ వేదనిలయో వేదవిద్ విదితాశయః .
ప్రభాకరో జితరిపుః సుజనోఽరుణసారథిః .. ౬౬..
కుబేరసురథః స్కన్దో మహితోఽభిహితో గుహుః .
గ్రహరాజో గ్రహపతిర్గ్రహనక్షత్రమణ్డనః .. ౬౭..
భాస్కరః సతతానన్దో నన్దనో నన్దివర్ధనః .
మఙ్గలోఽప్యథ మఙ్గలవాన్ మాఙ్గల్యోఽమఙ్గలాపహః .. ౬౮..
మఙ్గలాచారచరితః శీర్ణః సర్వవ్రతో వ్రతీ .
చతుర్ముఖః పద్మమాలీ పూతాత్మా ప్రణతార్తిహా .. ౬౯..
అకిఞ్చనః సత్యసన్ధో నిర్గుణో గుణవాన్ గుణీ .
సమ్పూర్ణః పుణ్డరీకాక్షో విధేయో యోగతత్పరః .. ౭౦..
సహస్రాంశుః క్రతుపతిః సర్వస్వం సుమతిః సువాక్ .
సుభామనో మాల్యదామా ఘృతాహారో హరిప్రియః .. ౭౧..
బ్రహ్మప్రచేతా ప్రథితః ప్రతీతాత్మా స్థిరాత్మకః .
శతబిన్దుః శతమఖో గరీయాన్ అనలప్రభుః .. ౭౨..
ధీరో మహత్తరో ధన్యః పురుషః పురుషోత్తమః .
విద్యాధరాధిరాజోఽహివిద్యావాన్ భూతిదస్థితః ..౭౩..
అనిర్దేశ్యవపుః శ్రీమాన్ విశ్వాత్మా బహుమఙ్గలః .
సుస్థితః సురథః స్వర్ణో మోక్షాధారనికేతనః .. ౭౪..
నిర్ద్వన్ద్వో ద్వన్ద్వహా సర్గః సర్వగః సమ్ప్రకాశయః .
దయాలుః సూక్ష్మరీః శాన్తిః క్షేమాక్షేమస్థితిప్రియః .. ౭౫..
భూతరో భూపతిర్వక్తా పవిత్రాత్మా త్రిలోచనః .
మహావరాహః ప్రియకృద్ ధాతా భోక్తాభయప్రదః .. ౭౬..
చతుర్వేదధరో నిత్యో వినిద్రో వివిధాశనః .
చక్రవర్తీ ధృతికరః సమ్పూర్ణోఽథ మహేశ్వరః .. ౭౭..
విచిత్రరథ ఏకాకీ సప్తసప్తిః పరాత్పరః .
సర్వోదధిస్థితికరః స్థితిస్థేయః స్థితిప్రియః .. ౭౮..
నిష్కలః పుష్కరనిభో వసుమాన్ వాసవప్రియః .
వసుమాన్ వాసవస్వామీ వసురాతా వసుప్రదః .. ౭౯..
బలవాన్ జ్ఞానవాంస్తత్త్వమ్ ఓంకారస్ తృషుసంస్థితః .
సంకల్పయోనిర్దినకృద్ భగవాన్ కారణావహః .. ౮౦..
నీలకణ్ఠో ధనాధ్యక్షశ్చతుర్వేదప్రియంవదః .
వషట్కారో హుతం హోతా స్వాహాకారో హుతాహుతిః .. ౮౧..
జనార్దనో జనానన్దో నరో నారాయణోఽమ్బుదః .
స్వర్ణాఙ్గక్షపణో వాయుః సురా సురనమస్కృతః .. ౮౨..
విగ్రహో విమలో బిన్దుర్విశోకో విమలద్యుతిః .
ద్యోతితో ద్యోతనో విద్వాన్ వివిద్వాన్ వరదో బలీ .. ౮౩..
ధర్మయోనిర్మహామోహో విష్ణుభ్రాతా సనాతనః .
సావిత్రీభావితో రాజా విసృతో విఘృణీ విరాట్ .. ౮౪..
సప్తార్చిః సప్తతురగః సప్తలోకనమస్కృతః .
సమ్పన్నోఽథ జగన్నాథః సుమనాః శోభనప్రియః .. ౮౫..
సర్వాత్మా సర్వకృత్ సృష్టిః సప్తిమాన్ సప్తమీప్రియః .
సుమేధా మాధవో మేధ్యో మేధావీ మధుసూదనః .. ౮౬..
అఙ్గిరా గతికాలజ్ఞో ధూమకేతుసుకేతనః .
సుఖీ సుఖప్రదః సౌఖ్యం కామీ కాన్తిప్రియో మునిః .. ౮౭..
సంతాపనః సంతపన ఆతపీ తపసాంపతిః .
ఉగ్రశ్రవా సహస్రోస్రః ప్రియఙ్కారో ప్రియఙ్కరః .. ౮౮..
ప్రీతో విమన్యురమ్భోదో జీవనో జగతాంపతిః .
జగత్పితా ప్రీతమనాః సర్వః శర్వో గుహావలః .. ౮౯..
సర్వగో జగదానన్దో జగన్నేతా సురారిహా .
శ్రేయః శ్రేయస్కరో జ్యాయానుత్తమోత్తమ ఉత్తమః .. ౯౦..
ఉత్తమోఽథ మహామేరుర్ధారణో ధరణీధరః .
ధారాధరో ధర్మరాజో ధర్మాధర్మప్రవర్తకః .. ౯౧..
రథాధ్యక్షో రథపతిస్ త్వరమాణోఽమితానలః .
ఉత్తరోఽనుత్తరస్ తాపీ తారాపతిరపాంపతిః .. ౯౨..
పుణ్యసంకీర్తనః పుణ్యో హేతుర్లోకత్రయాశ్రయః .
స్వర్భానుర్విహగారిష్టో విశిష్టోత్కృష్టకర్మకృత్ .. ౯౩..
వ్యాధిప్రణాశనః క్షేమః శూరః సర్వజితామ్బరః .
ఏకనాథో రథాధీశః శనైశ్చరపితాసితః .. ౯౪..
వైవస్వతగురుర్మృత్యుర్ధర్మనిత్యో మహావ్రతః .
ప్రలమ్బహారః సంచారీ ప్రద్యోతో ద్యోతితోఽనలః .. ౯౫..
సంతానకృత్ పరో మన్త్రో మన్త్రమూర్తిర్మహాబలః .
శ్రేష్ఠాత్మా సుప్రియః శమ్భుర్మహతామీశ్వరేశ్వరః .. ౯౬..
సంసారగతివిచ్ఛేతా సంసారార్ణవతారకః .
సప్తజిహ్వః సహస్రార్చీ రత్నగర్భోఽపరాజితః .. ౯౭..
ధర్మకేతురమేయాత్మా ధర్మాధర్మవరప్రదః .
లోకసాక్షీ లోకగురుర్లోకేశశ్ ఛన్దవాహనః .. ౯౮..
ధర్మరూపః సూక్ష్మవాయుర్ధనుష్పాణిర్ధనుర్ధరః .
పినాకధృన్ మహోత్సాహో నైకమాయో మహాశనః .. ౯౯..
వారః శక్తిమతాంశ్రేష్ఠః సర్వశస్త్రభృతాంవరః .
జ్ఞానగమ్యో దురారాధ్యో లోహితాఙ్గోఽరిమర్దనః .. ౧౦౦..
అనన్తో ధర్మదో నిత్యో ధర్మకృచ్చిత్ త్రివిక్రమః .
దైవత్రస్ త్ర్యక్షరో మధ్యో నీలాఙ్గో నీలలోహితః .. ౧౦౧..
ఏకోఽనేకస్ త్రయీవ్యాసః సవితా సమితిఞ్జయః .
శార్ఙ్గధన్వానలో భీమః సర్వప్రహరణాయుధః .. ౧౦౨..
పరమేష్ఠీ పరంజ్యోతిర్నాకపాలీ దివస్పతిః .
వదాన్యో వాసుకిర్వైద్య ఆత్రేయోఽతిపరాక్రమః .. ౧౦౩..
ద్వాపరః పరమోదారః పరమబ్రహ్మచర్యవాన్ .
ఉద్దీప్తవేషో ముకుటీ పద్మహస్తోఽహిమాంశుభృత్ .. ౧౦౪..
స్మితః ప్రసన్నవదనః పద్మోదరనిభాననః .
సాయందివా దివ్యవపురనిర్దేశ్యో మహారథః .. ౧౦౫..
మహారథో మహానీశః శేషః సత్త్వరజస్తమః .
ధృతాతపత్రః ప్రతిమో విమర్శీ నిర్ణయస్థితః .. ౧౦౬..
అహింసకః శుద్ధమతిరద్వితీయో విమర్దనః .
సర్వదో ధనదో మోక్షో విహారీ బహుదాయకః .. ౧౦౭..
గ్రహనాథో గ్రహపతిర్గ్రహేశస్ తిమిరాపహః .
మనో హరవపుః శుభ్రః శోభనః సుప్రభాననః .. ౧౦౮..
సుప్రభః సుప్రభాకారః సునేత్రో నిక్షుభాపతిః .
రాజ్ఞీప్రియః శబ్దకరో గ్రహేశస్ తిమిరాపహః .. ౧౦౯..
సైంహికేయరిపుర్దేవో వరదో వరనాయకః .
చతుర్భుజో మహాయోగీ యోగీశ్వరపతిస్ తథా .. ౧౧౦..
అనాదిరూపోఽదితిజో రత్నకాన్తిః ప్రభామయః .
జగత్ప్రదీపో విస్తీర్ణో మహావిస్తీర్ణమణ్డలః .. ౧౧౧..
ఏకచక్రరథః స్వర్ణరథః స్వర్ణశరీరధృక్ .
నిరాలమ్బో గగనరో ధర్మకర్మప్రభావకృత్ .. ౧౧౨..
ధర్మాత్మా కర్మణాంసాక్షీ ప్రత్యక్షః పరమేశ్వరః .
మేరుసేవీ సుమేధావీ మేరురక్షాకరో మహాన్ .. ౧౧౩..
ఆధారభూకో రతిమాంస్తథా చ ధనధాన్యకృత్ .
పాపసంతాపసంహర్తా మనోవాంఛితదాయకః .. ౧౧౪..
లోకహర్తా రాజ్యదాయీ రమణీయగుణోఽనృణీ .
కాలత్రయానన్తరూపో మునివృన్దనమస్కృతః .. ౧౧౫..
సంధ్యారాగకరః సిద్ధః సంధ్యావన్దనవన్దితః .
సామ్రాజ్యదాననిరతః సమారాధనతోషవాన్ .. ౧౧౬..
భక్తదుఃఖక్షయకరో భవసాగరతారకః .
భయాపహర్తా భగవాన్ అప్రమేయపరాక్రమః .. ౧౧౭..
మనుస్వామీ మనుపతిర్మాన్యో మన్వన్తరాధిపః .. ౧౧౮..

ఇతి శ్రీ భవిష్యే మహాపురాణే సూర్యసహస్రనామ స్తోత్రం సమ్పూర్ణమ్